Min. w’Intebe, Dr. Ngirente yatangije ikigega cyo guteza imbere ubumenyi, ikoranabuhanga n’ubushakashatsi

0 1,853

Mu gitondo cyo kuri uyu wa 13 Kamena 2018, Minisitiri w’Intebe, Dr. Edouard Ngirente yatangije ku mugaragaro ikigega kizafasha guteza imbere ubumenyi, ikoranabuhanga, ubushakashatsi no guhanga udushya (National Research and Innovation Fund) iki kigega kikazibanda ku gufasha cyane cyane abakiri bato kwihangira imirimo no gukora ubushakashatsi bagamije guteza imbere igihugu.

Mu ijambo rye yagejeje ku bari muri uwo muhango i Kigali, Min. w’Intebe Dr. Ngirente yagize ati “Ubuyobozi bwa Perezida Paul Kagame ntibuzahwema gutera in kunga ubumenyi n’ikoranabuhanga bishingiye ku gushakira amasoko abakiri bato bafite impano yo guhanga udushya.

Yasabye abahuriye muri iki kigega gutera inkunga abanyarwanda bakiri bato bakabafasha mu gukora ubushakashatsi hagendewe ku bisanzwe ari inkingi z’iterambere mu Rwanda.

Umujyanama akaba n’umushakashatsi muri iki kigo, Prof Mbonye yavuze ko bitewe no kuba ari ubushakashatsi bufite ingengo y’Imari ndetse bushyigikiwe n’inzego za leta buzibanda ku bintu bifitiye inyungu igihugu bityo bukazaba butandukanye cyane n’ubusanzwe bukorwa bugaherera mu mpapuro gusa.

Yagize ati “Ubushakashatsi tugiye gukora si nka bwa bundi dukunda kuvuga, bwo muri za kaminuza dukora ubushakashatsi butagira ikibuvamo burangirira mu kwandika impapuro”

Yakomeje avuga ko ubu bushakashatsi buzibanda ku bintu biranga iterambere n’imibereho myiza y’umuturage mu buzima bwe bwa buri munsi birimo ubuhinzi, ubuzima, Ikoranabuhanga, ingufu, inganda n’ibindi.

Nubwo yirinze gutangaza ingengo y’imari iki kigega gitangiranye, Prof Mbonye yavuze ko bafite ubushobozi bwo gutangira ibikorwa by’ubushakashatsi bugamije iterambere ry’igihugu, bikazagenda byiyongera ndetse n’uruhare rwa leta y’u Rwanda rukazagenda rugaragara umwaka ku wundi.

Avuga ku bijyanye n’imihindagurikire y’ikirere, yagize ati “Tuzakora ubushakashatsi ku buryo ibihingwa byahangana n’ikibazo cy’imihindagurikire y’ikirere kiri kugenda kidusatira ndetse dufite no kuvumbura ibihingwa bishobora guhangana n’izuba ryinshi binyuze muri ubwo bushakashatsi […]”

Prof. Clet Niyikiza avuga ko hazavumburwa imbuto zihangana n’imihindagurikire y’ikirere

Ati “Tuzavumbura n’izindi mbuto zizashobora guhangana n’izuba”

Ku rundi ruhande, uyu muyobozi avuga ko hakiri ikibazo cy’abashakashatsi bacye mu gihugu, ari yo mpamvu hazifashishwa ingengo y’Imari iri muri iki kigega mu guhugura abakiri bato bityo na bo bakazafashanya mu bihe bizaza.

Yagize ati “Ntabwo dufite abashakashatsi benshi kandi nitwe tugomba kubishakira, icyo kigega tuzagikoresha twigisha abantu gukora ubushakashatsi no guhanga udushya.”

“Twe tuzakora ubushakashatsi twabanje kuganira na za Minisiteri na Guverinoma kuko ni zo zibitse ibigo by’abikorera, ubushobozi burahari ariko ntiburaba bwinshi buzagenda bwiyongera buri mwaka gusa buzarebera imishinga twatangiranye ariko bageti ntabwo irasohoka.”

Undi mushakashatsi, Prof Niyikiza we yavuze ko usanga ibihugu byateye imbere cyane ku isi ari ibihugu bikoresha tekinoloji cyane bityo n’u Rwanda rukaba rugomba kuza muri ibyo bihugu.

Yagize ati “ku gihugu nk’iki cy’u Rwanda, icya ngombwa ni uko ubukungu bwacyo bushingiye ku baturage, rishingira no ku bumenyi kuko Abanyarwanda bafite ubuhanga bwo kuzamura ubukungu hashingiwe ku ikoranabuhanga.”

“Niyo mpamvu harebwe ku buryo abanyarwanda bakiri bato baterwa inkunga kugira ngo ibyo bazabigereho.”

Prof Manassé Mbonye avuga ko Abanyarwanda bafite ubushobozi bwo kwiteza imbere binyuze mu guhanga udushya

Iki kigo gifite intego ko mu myaka izaza kizajya kiharira byibuze 1/100 by’ubukungu bw’igihugu.

Ingengo y’Imari iki kigega cyatangiranye ntiyatangajwe, ngo izajya ahagaragara ari uko iy’igihugu na yo yagiye ahagaragara.

PM Edouard mu muhango wo gutangiza ikigega “National Research and Innovation Fund”

 

Tanga igitekerezo

Your email address will not be published.