Musanze: Polisi yaganirije Abayisilamukazi baho ku ihohotera rishingiye ku gitsina

370

Mu rwego rwo gukomeza gufatanya n’izindi nzego gukumira no kurwanya ihohotera rishingiye ku gitsina, ku cyumweru tariki 13 Gicurasi uyu mwaka; Polisi mu karere ka Musanze yagiranye ikiganiro n’Abayisilamukazi baho 359 ku ihohotera rishingiye ku gitsina, ibasaba kugira uruhare mu gukumira iki cyaha.

Ubu butumwa bwatanzwe n’Umuvugizi wa Polisi mu Ntara y’Amajyaruguru, Chief Inspector of Police (CIP) Hamdun Twizeyimana afatanyije n’ushinzwe iyubahirizwa ry’ihame ry’uburinganire muri Polisi muri iyi Ntara, CIP Cecile Nyirandegeya.

Mu kiganiro yagiranye na bo cyabereye mu kagari ka Mpuge, mu murenge wa Muhoza, CIP Twizeyimana yababwiye amoko y’ihohotera rishingiye ku gitsina, ikiritera, ingaruka zaryo ku wakoze iki cyaha n’uwagikorewe; ndetse n’ingaruka bigira ku miryango yabo n’umuryango nyarwanda muri rusange.

Yavuze ko ibyaha by’ihohotera rishingiye ku gitsina bishobora gukorwa n’ibitsina byombi; atanga urugero rw’umugabo cyangwa umugore ubuza uburenganzira ku mutungo uwo bashakanye, kumukubita, kumuhoza ku nkeke ; cyangwa kumukoresha imibonano mpuzabitsina ku gahato.

CIP Twizeyimana yababwiye ko ibi byaha; kimwe n’ibindi bifitanye isano na byo bikorwa ahanini n’abanyoye ibiyobyabwenge nk’urumogi, Kanyanga, Muriture, n’ibindi; abakangurira kwirinda kubicuruza no kubinywa ; kandi abasaba gutungira agatoki Polisi ababikora.

Yagize ati,”Umuntu uhamwe n’icyaha cy’ihohotera rishingiye ku gitsina arafungwa, kandi agacibwa ihazabu. Uwahohotewe bimugiraho ingaruka zirimo kuba agira ipfunwe bitewe n’ibyamubayeho, ihungabana no gutakaza icyizere. Murumva ko bombi bagerwaho n’ingaruka zaryo. Ni yo mpamvu buri wese akwiriye kwirinda guhohotera undi kuko ari igitsina runaka; kandi akagira uruhare mu kurirwanya no kurikumira atanga ku gihe amakuru yerekeranye n’abarikorewe , abarikoze ndetse n’aho arikeka.”

Yababwiye kujya batanga amakuru yerekeranye n’ihohotera rishingiye ku gitsina kuri nimero za telefone zitishyurwa kuri 3029 (Isange One Stop Centers) na 3512 (Ishami rya Polisi y’u Rwanda rishinzwe gukumira no kurwanya ihohotera rishingiye ku gitsina) cyangwa bakayatanga kuri Sitasiyo ya Polisi ibegereye; bakaba ndetse babimenyesha inzego z’ibanze.

Mu butumwa yabagejejeho, CIP Nyirandegeya yababwiye ati, “Bamwe mu bagabo bahohotera abo bashakanye bibwira ko ari byo bituma babubaha. Iyo myitwarire iteza umutekano muke mu muryango; kandi Umuryango nk’uwo ntushobora gutera imbere. Abagize Umuryango bakwiriye kubahana; kandi bakabana mu mahoro n’ubwumvikane. ”

Abafitanye ibibazo yabagiriye inama yo kugana inzego zibishinzwe kugira ngo zibakiranure cyangwa zibagire inama aho kwifatira ibyemezo bivamo guhohotera undi.

Usibye ihohotera rishingiye ku gitsina, Polisi yaganirije kandi abo Bayisilamukazi ku icuruzwa ry’abantu; kuri iyi ngingo CIP Nyirandegeya akaba yabagiriye inama yo kwima amatwi uwababwira ko ashaka kubajyana mu bindi bihugu abizeza akazi n’ibindi bitandukanye.

Yababwiye ati,”Nihagira ubizeza ibyo bitangaza, ntimukabyihererane; muzabimenyeshe Polisi y’u Rwanda n’izindi nzego zibishinzwe kugira ngo hasuzumwe niba atari ushaka abo kujya gucuruza.”

Yababwiye ko abacuruza abantu iyo babagejeje iyo babajyana, babambura ibyangombwa byose; hanyuma bakabakoresha imirimo ivunanye nta gihembo; ubundi bakabashora mu bikorwa by’urukozasoni birimo ubusambanyi bwinjiriza inyungu ababubashoramo.

Umuyobozi w’Abayisilamu mu karere ka Musanze, Cheikh Nuhu Quraish Bayavuge yashimye Polisi ku butumwa yagejeje kuri abo Bayisilamukazi; abasaba gukurikiza inama bagiriwe no gushyira mu bikorwa ibyo bigishijwe.

Musubize:

Tanga igitekerezo
Andika amazina