DGPR

Kwamamaza

Kwamamaza

Nyamasheke: Mu mirenge ya Kanjongo na Bushekeri hatoraguwe imbunda abaturage bahinga

0

Amakuru agera kuri Bwiza.com avuga ko mu mirenge ya Kanjongo na Bushekeri mu karere ka Nyamasheke  gutoraguwe imbunda abaturage bahinga, ngo bikaba bigaragara ko aho zakuwe zahatabwe mu myaka ishize binagendanye n’ibihe igihugu cyanyuzemo, zikaba zitoraguwe hashize iminsi mike cyane no mu murenge wa Bushenge muri aka karere hatoraguwe gerenade mu gitsinsi cy’insina ubwo nanone umuturage yari arimo ahinga.

Iyi ni yo yatoraguranywe n’amasasu yayo mu kagari ka Mpumbu Bushekeri abaturage barimo barwanya kirabiranya.

Nk’uko bikomeza biivugwa n’abaturage, ngo imbuda yabonetse mu murenge wa Kanjongo yabonywe mu kagari ka Susa, ubwo umukecuru Mukanzitonda Xavéra w’imyaka 62 y’amavuko yahingaga umurima wa musaza we witwa Safari Jack,arimbuye igiti cy’umuhati abona mo imbunda yo mu bwoko bwa NATO/L4 ahita abimenyesha ubuyobozi.

Uyu Safari Jack nyiri umurima wahingwaga ngo yahoze ari umujandarume kuri Leta ya Habyarimana,aza gukora n’igisirikare cya RPA, akomereza muri RDF aza gusezererwa mu ngabo mu 1997,aza kwitaba Imana muri Kanama umwaka ushize.

Iyatoraguwe mu murenge wa Bushekeri yo ngo yabonywe mu kagari ka Mpumbu na yo ikaba ngo ari iyo mu bwoko bwa NATO na magazin yayo n’amasasu 82 ibitse mu isashe mu mufuka,ibonwa n’abaturage bari mu gikorwa cyo kurwanya kirabiranya mu murima w’urutoki rw’uwitwa Nyiramukokwe Immaculée.

Uyu Nyiramukokwe ngo akaba yari afite umuhungu w’umusirikare wahungiye muri Kongo mu 1994,umugabo we na we akaba ngo yarabaye umupolisi mbere ya Jenoside yakorewe abatutsi,iyi mbunda bikagaragara ko yari ishaje.

Mu kiganiro na Bwiza.com, umuyobozi w’akarere ka Nyamasheke, Kamari Aimé Fabien yemeje aya makuru,avuga ko usanga bifitanye isano n’ahantu hari abasirikare bo mu ngabo zatsinzwe,abandi ari interahamwe cyangwa indi mitwe yitwaraga gisirikare,aho zagiye zitabwa mu mirima,kuko ngo n’iyi gerenade yatoraguwe mu murenge wa Bushenge na yo yabonetse umuturage ahinga,byose bikaba byarahise bishyikirizwa inzego zishinzwe umutekano.

Iyi yatoraguwe mu kagari ka Susa,umurenge wa Kanjongo mu giti cy’umuhati ubwo umukecuru yahingaga mu murima wa musaza we wigeze kuba umujandarume mu ngabo zatsinzwe.

Kuba bigaragara ko zimaze iminsi zihatabwe ariko zikaba zari zitaraboneka,Meya Kamari yagize ati’’ aha hantu bigaragara ko abahingaga mbere batajyaga bahageza isuka, ahubwo hararundwaga nk’ibyatsi bahinga, umuntu yahageza isuka bwa mbere agahita abona biriya bikoresho bya gisirikari, bikaba bitabura gutera impungenge abaturage natwe ubuyobozi kuko biri aho bitagombye kuba biri, kandi bikaba bishobora guteza umutekano muke igihe nk’uwo wahunze yabona uburyo agaruka akabikoresha,ariko turizeza abaturage ko umutekano uhari usesuye n’uwagerageza kuwuhungabanya bitamuhira.’’

Avuga ko byahise byerekwa abaturage banabwirwa ububi bwabyo, banasabwa kugaragaza ahantu hose bakeka igikoresho cya gisirikare mu baturage kigashyikirizwa inzego zibishinzwe,n’uwagira ubwoba bwo kubyerekana ku mugaragaro akaba yakoresha uburyo yumva bwamworohera kubyerekana,kuko kubifatanwa ari byo bibi kuruta kubishyikiriza inzego z’umutekano hakiri kare.

Izi mbunda n’iyi gerenade bibonywe mu gihe muri Nzeri umwaka ushize mu murenge wa Gihombo na ho hatoraguwe gerenade 2 abaturage bahinga zihishe mu gitsinsi cy’intusi zigahita ziturikirizwa aho n’inzego zishinzwe umutekano, bamwe mu baturage bakagaragaza impungenge ko hari n’ababa bahishe ibikoresho nk’ibi mu nzu zabo,bakaba babikoresha babiba cyangwa mu bundi bugizi bwa nabi.

BAHUWIYONGERA Sylvestre

 

Tanga igitekerezo cyawe

Your email address will not be published.