FPR

Kwamamaza

Kwamamaza

Rwamagana: Meya Mbonyumuvunyi yijeje Abasenateri ko ubuzima bw’abasigajwe inyuma n’amateka bwavuguruwe

0

Umuyobozi w’akarere ka Rwamagana, Mbonyumuvunyi Radjabu avuga ko ubuzima bw’abasigajwe inyuma n’amatega bugenda buhinduka.

Yabitangajwe ku wa 26 Kamena 2018, ubwo Abasenateri bagize komisiyo y’imibereho myiza mu nteko ishinga amategeko umutwe wa Sena basuraga aka karere bareba uko imibereho y’abahejejwe inyuma n’amateka ihagaze.

Meya avuga ko muri rusange abatishoboye barimo n’abasigajwe inyuma n’amateka bagezwaho gahunda zibafasha kuva mu bukene.

Ati “Muri gahunda zigamije kuzamura imibereho myiza y’abatishoboye n’abasigajwe inyuma n’amateka harimo, Gahunda ya Girinka, inkunga y’ingoboka, guhabwa imirimo muri gahunda ya VUP n’izindi.”

Avuga ko Abasigajwe inyuma n’amateka by’umwihariko, bubakiwe, abana barihirirwa amashuri, ati “Imiryango y’abasigajwe inyuma n’amateka yahomewe amazu, indi iranubakirwa. Mu rwego rwo gukomeza gushishikariza abasigajwe inyuma n’amateka kwiga, Abana biga mu mashuri abanza bahawe ibikoresho by’ishuri binyuze muri gahunda y’ubufasha bugenewe abatishoboye”.

Yakomeje avuga ko mu karere ka Rwamagana, urubyiruko rw’abasigajwe inyuma n’amateka rutabashije gukomeza amashuri rugenda rwigishwa imyuga inyuranye, aho 10 bayirangije abandi 14 bakaba bacyiga. Bamwe mu barangije kwiga ngo bahawe n’ibikoresho byo gutangira kwikorera.

Meya Mbonyumuvunyi yavuze ko nk’Akarere bazakomeza kuzamura imibare y’abasigajwe inyuma n’amateka muri gahunda zigamije kuzamura imibereho myiza muri rusange, kubashishikariza kwiga, kwita ku isuku, gukunda umurimo, kuringaniza imbyaro, gusana amazu yabo no kubakira abatayagira.

Senateri Uwimana Consolee, avuga ko intego ya Leta y’u Rwanda ari uko abaturage bose bagomba kuzamukira rimwe mu iterambere ntawe usigaye inyuma kandi ko no mu mahame remezo Leta igenderaho ari uguharanira imibereho myiza y’abaturage bakagira amahirwe angana.

Senateri Uwimana yavuze ko hari ibindi byiciro byari byarasigajwe inyuma n’amateka birimo: abagore, urubyiruko,… ariko bikaba bimaze kugera ku rwego rushimishije.

Mu karere ka Rwamagana habarurirwa imiryango 214 y’abasigajwe inyuma n’amateka; yose hamwe ikaba igizwe n’abaturage 722.

 

 

Tanga igitekerezo cyawe

Your email address will not be published.