Sudani y’Epfo: Umuvugizi wa Dr Riek Machar yakatiwe igihano cyo kwicwa amanitswe

12

Urukiko rwo muri Sudani y’Epfo rwakatiye igihano cyo kwicwa amanitswe, James Gatdet Dak, umuvugizi wa Dr Riek Machar, rusobanura ibiteganywa mu itegeko nshinga byagendeweho mu gufata iki cyemezo.
Dak yari akurikiranweho ibyaha byinshi birimo ibyaha by’ubugambanyi. Urukiko rudasanzwe rukaba rwatangaje umwanzuro rumukatira igihano cy’urupfu kuri uyu wa Mbere, itariki 12 Gashyantare.
Umwunganizi wa Dak witwa Monyluak Alor Kuol we aravuga ko uru rubanza rwihishwe inyuma n’impamvu za politiki.
Monyluak Alor Kuol  ati: “Murabizi twikuye ubushize mu rubanza kubera ko twabonye ko byose ari politiki. None kubera ko rwari urubanza rwa politiki, twatekereje ko rwari kwitabwaho no mu nzira za politiki nk’iy’amahoro nk’iy’addis abeba, yahamagariye ifungurwa ry’imfungwa za politiki kubera ko ibirego  atari ibirego by’ibyaha.”
Uyu yakomeje avuga ko kubw’amahirwe makeya kuri uyu wa mbere bumvise urukiko rutangaza umwanzuro bakumva ko James yakatiwe igihano cy’urupfu amanitswe.
Urukiko nk’uko iyi nkuru dukesha Sudani Tribune, rwamuhamije icyaha cyo gushishikariza ubugizi bwa nabi kijyana n’ibyaha by’ubugambanyi nk’uko biteganywa n’ingingo ya 64 y’amategeko yo muri iki gihugu, gukwirakwiza impuha bigamije guhungabanya umutekano wa Sudani y’Epfo, icyaha gihanwa n’ingingo ya 75, ndetse no gutuka umukuru w’igihugu gihanwa n’ingingo ya 76.
Umucamanza Ladu Armenio asoma umwanzuro w’urukiko, akaba yavuze ko abo mu muryango wa Dak bafite uburenganzira bwo kujurira mu gihe kitarenze iminsi 15.
Kuwa 03 Ugushyingo 2016 nibwo abayobozi ba Kenya bataye muri yombi basubiza muri Sudani y’Epfo Gatdet Dak wari umuvugizi wa Dr Riek Machar, umukuru w’umutwe wa SPLA-IO urwanya ubutegetsi bwa perezida Salva Kiir.
 
Kanda hano wiyandikishe ( Subscribe) ubona ibiganiro, indirimbo kandi bishya mu mashusho

Musubize:

Tanga igitekerezo
Andika amazina