Urutonde rw’abakobwa b’Abanyafurika begukanye ikamba rya nyampinga w’Isi (Miss World) kuva mu 1950

0 573

Buri mwaka, niko ibihugu bitandukanye byo ku Isi bitegura amarushanwa yo gutora umukobwa uhiga abandi mu bwiza, akambikwa ikamba rya nyampinga. Ni muri urwo rwego uyu muhango unakorwa ku rwego rw’Isi, abakobwa bagaturuka imihanda yose bagatoranywamo umwe uhiga abandi akambikwa ikamba rya nyampinga w’Isi ‘Miss World’.

Ni muri urwo rwego Bwiza.com, yabakusanyirije amakuru y’abegukanye iri kamba rya Nyampinga w’Isi, bakomoka ku mugabane wa Afurika kuva mu mwaka wa 1950.

1.Antigone Costanda:  Costanda akomoka muri Misiri, azwi cyane mu mwuga wo kumurika imideli, akaba yarahize imbaga y’abakobwa mu bwiza yambikwa ikamba rya Nyampinga w’Isi mu mwaka wa 1954.

 Costanda ni umwarabukazi wavutse mu mwaka wa 1934 mu Mujyi wa Cairo mu Misiri, yabaye Miss w’isi afite imyaka 20, kugeza n’iyi saha akaba akiriho, afite imyaka 84 y’amavuko.

 

Ku wa 18 Ukwakira 1954, nibwo uyu mukobwa yambitswe iri kamba mu birori byaberaga mu Bwongereza, aba umukobwa wa mbere wo muri Misiri wari ubashije kwesa uyu muhigo. Mu mwaka wa 1955 uyu mukobwa ntabwo yabashije kongera kwitabira aya marushanwa kuko mu gihugu cye cy’amavuko[Misiri] hari intambara.

Costanda afatwa nk’uwateje imbere muri Misiri ibijyanye n’imideli, ndetse akaba yaragiye ahabwa inshingano mu gutegura amarushanwa nya Miss Misiri, akaba abiherukamo mu mwaka wa 2006. Mu buzima bwe busanzwe akaba ari rwiyemezamirimo mu bijyanye n’imideli.

2.Penelope Anne Coelen: Anne akomoka muri Afurika y’Epfo, yahize abandi bakobwa bo ku Isi mu bwiza mu mwaka wa 1958, yambikwa ikamba rya nyampinga w’Isi.

Anne yavutse ku wa 15 Mata mu 1940 mu mujyi wa Durban muri Afurika y’Epfo, yabaye Nyampinga w’Isi afite imyaka 18 y’amavuko, ubu akaba afite imyaka 78.

Ubwo yambikwaha iri kamba, yari ahize abandi bakobwa 22 bari baturutse ku migabane itandukanye, ni we mukobwa wa mbere wo muri Afurika y’Epfo wari ubashije kwegukana iri kamba.

Anne yashakanye n’umukire w’umuhinzi w’ibisheke, Michel Rey ukomoka mu Ntara ya Natal, babyaranye abana batanu, ariko bakaba bafite umwuzukuru umwe wabyawe n’umuhungu wabo.

3.Anneline Kriel: Ku wa 28 Nyakanga 1955, nibwo Anneline yabonye izuba mu Mujyi wa Pretoria, muri Afurika y’Epfo. Ubu afite imyaka 63.

Anneline azwi mu mwuga wo gukina film, kumurika imideli by’umwihariko akaba yarabaye nyampinga w’isi mu mwaka wa 1974, ubwo yari afite imyaka 19 y’amavuko, muri uyu mwaka kandi yari na Miss wa Afurika y’Epfo.

Anneline yatorewe kuba Nyampinga w’Isi asimbuye umwongerezakazi, Helen Morgan wari ufite uyu mwanya ariko aweguraho. Muri uyu mwaka wa 2018, Anneline yagaragaye mu birori byo kwizihiza imyaka 60 ishize Igihugu cya Afurika y’Epfo kigize nyampinga w’Isi.

4.Agbani Darego: Amazina ye yose yiswe n’ababyeyi ni Agbani Asenite Darego, yavutse ku wa 22 Ukuboza 1982, i Lagos muri Nigeria, mu muryango w’abana umunani, we ari umwana wa gatandatu.

Mu mwaka wa 2001, Darego yahize abandi bakobwa bo muri Nigeria mu bwiza yambikwa ikamba, anahita ahagararira iki gihugu mu marushanwa ya Nyampinga w’Isi nabwo yambikwa ikamba rya Nyampinga w’isi.

Kubera kutabona akanya ko gukurikira amasomo ye, mu mwaka wa 2012, nibwo Darego yarangije icyiciro cya kabiri cya kaminuza muri Pyschology.

Mu mwaka wa 2017, yashakanye na Ishaya Danjuma, ubyarwa n’umuherwe Gen. Theophilus Yakubu Danjuma, wo muri Maroc. Urukundo rwabo ngo rukaba wari rumaze imyaka myinshi ruzwi ariko ubukwe ntibutahe.

5.Rolene Strauss: Rolene yabonye izuba ku wa 22 Mata 1992, mu gace ka Volksrust muri Afurika y’Epfo. Mu mwaka wa 2014 yahize abandi bakobwa mu bwiza muri iki gihugu anambikwa ikamba rya nyampinga.

Muri uwo mwaka kandi nibwo yahise ajya guhagararira iki gihugu mu marushanwa ya nyampinga w’Isi, atahana intsinzi aba Nyampinga w’Isi atyo, afite imyaka 22 y’amavuko.

Rolene Strauss yambitswe ikamba rya nyampinga w’Isi ari umukobwa wa gatatu ukomoka muri Afurika y’Epfo uryambitswe. Mu buzima bwe bwite, avuka kuri Theresa wari umuforomokazi, na Hennie Strauss wari muganga (Docter).

Agendeye ku izina ry’umuryango, Strauss yashinze umuryango utegamiye kuri Leta awita ‘The Strauss Foundation’ wafashaga abanyeshuri biga iby’ikiganga.

Mu mwaka wa 6 Gashyantare 2016, nibwo Rolene Strauss yashakanye na D’Niel, babyara umwana w’imfura muri Mutarama 2017.

 

Tanga igitekerezo

Your email address will not be published.