DGPR

Kwamamaza

Kwamamaza

Urwego rw’Umuvunyi ruranenga zimwe mu nzego z’ubuyobozi zikigorana mu gutanga amakuru

0

Urwego rw’umuvunyi ruvuga ko hakiri zimwe mu nzego z’ubuyobozi zigitanga amakuru bigoranye bityo bikaba byagira ingaruka zirimo no kuba umunyamakuru yajya kwishakishiriza andi makuru ku ruhande ndetse rimwe na rimwe akaba yatangaza atari yo.

Ibi ni bimwe mu byatangajwe n’ umukozi w’Urwego rw’Umuvunyi ushinzwe gukurikirana imyitwarire y’abayobozi, Mugeni Cecile mu nama yabaye kuri uyu wa Kabiri tariki ya 12 Kamena 2018, yari yahuje Itangazamakuru n’abakozi b’inzego zitandukanye bashinzwe gutanga amakuru, ikaba yagaragarijwemo imbogamizi zitandukanye zirimo n’izo kutamenya itegeko ryerekeye kubona amakuru kw’abashinzwe kuyatanga .

Cecile agira ati “Wanga gutanga amakuru bigatuma umunyamakuru wayasabye atangira kwishakira ayandi ku ruhande ndetse birashoboka ko atangira gutangaza amakuru atari yo ku nzego zacu”.

Nubwo nta rwego runaka rwatunzwe agatoki, uyu muyobozi akomeza avuga ko Urwego rw’Umuvunyi rukomeje ibikorwa byo gutumiza inzego zitandukanye rukazinenga kudatanga amakuru ndetse n’amazina y’abayobora izo nzego akazajya atangarizwa mu ruhame.

Bimwe mu bibazo byagaragajwe n’itangazamakuru ku bayobozi birimo kwanga kurivugisha bavuga ku bari munama, ko batwaye imodoka n’ibindi kuva kuwa Mbere kugeza ku wundi wanabasanga mu biro bakagutamo.

Umuvugizi wa Polisi y’igihugu, ishami rishinzwe umutekano wo mu muhanda, CIP Emmanuel Kabanda avuga ko itangazamakuru ritari rikwiye gukomeza kugaragara nk’umwanzi w’izindi nzego.

CIP Kabanda agira ati “Kuri twe tubona itangazamakuru nk’umuhuza wacu n’abaturage dushinzwe kurindira umutekano. Nta buryo bamenya ibyo dukora tutabinyujije mu itangazamakuru.”

Itegeko ryerekeye no kubona amakuru ryatowe kuva muri 2013, kuva icyo gihe Urwego rw’Umuvunyi rukaba rumaze kwakira ibirego 20 birimo 15 by’abanyamakuru barega abayobozi bakuru kudatanga amakuru.

Kuva icyo gihe kandi kugeza ubu, Urwego rw’Abanyamakuru bigenzura (RMC) na rwo rwakiriye ibirego bigera kuri 297 itangazamakuru ryagiranye n’abantu ku giti cyabo cyangwa inzego z’ubuyobozi muri rusange.

Tanga igitekerezo cyawe

Your email address will not be published.