Ikigo cy’igihugu cy’iteganyagihe Meteo-Rwanda cyatangaje ko mu ntangiro za Gicurasi hateganyijwe imvura iruta iyari isanzwe igwa.
Imvura nyinshi iteganyijwe cyane cyane hagati y’itariki ya 1 n’itariki ya 4 Gicurasi 2024. Bikaba biteganyijwe ko izaturuka ku isangano ry’imiyaga ihehereye mu karere hamwe n’imiterere ya buri hantu.
Biteganyijwe ko imvura iri hagati ya Milimetero 160 na 200 izinganza mu bice byinshi by’uturere twa Burera, Musanze, Nyabihu, Ngororero, Rutsiro no mu bice bicye by’uturere twa Gakenke, Rubavu, Rusizi, Nyamasheke, Nyamagabe na Nyaruguru.
Ni mu gihe mu bice bisigaye by’Intara y’Iburengerazuba n’uturere twa Musanze na Burera, ibice byo hagati bishyira uburengerazuba bw’uturere twa Gakenke, Nyamagabe na Nyaruguru, no mu majyaruguru y’Akarere ka Muhanga hateganyijwe imvura iri hagati ya milimetero 140 na 160.
Mu mwaka ushize mu matariki abanza y’ukweze kwa Gicurasi, imvura idasanzwe yibasiye tumwe mu turere tw’Intara y’Iburengerazuba n’iy’Amajyepfo abarenga 100 bahasiga ubuzima.
Tanga igitekerezo