Kuri uyu wa gatanu, tariki ya 22 Nzeli 2023 , ku cyicaro gikuru cya REB habereye igikorwa cyo gusoza ku mugaragaro ibikorwa by’umushinga Ministeri y’Uburezi yari ifatanyije n’umushinga wa Leta y’Ubwongereza witwa Building Learning Foundations cyangwa BLF mu mpine.
Ni umushinga watwaye akayabo ka miliyari 50 z’amafaranga y’u Rwanda yakoreshejwe mu kongerera ubumenyi abarimu n’abanyenshuri mu masomo y’icyongereza n’imibare.
Umunyamabanga wa Leta ushinzwe uburezi Claudette Irere, yashimiye abatanyabikorwa bagize uruhare mu guteza imbere ireme ry’uburezi. Yasabye REB, NESA, abayobozi b’ibigo by’amashuri ndetse n’abarimu gukomeza gushyigikira ibikorwa bya BLF yatangije kuko byagaragaye ko imitsindire y’abanyenshuri muri ayo masomo yazamutse ku rugero rushimishije.
Isuzuma ryakozwe na BLF, ryagaragaje ko abanyeshuri biga mu mwaka wa 1 kugera muwa 3 batsinze isomo ry’icyongereza ku kigereranyo cya 54% ugereranyije na 19% bari bafite muwi 2018. Aha isuzuma rya BLF ryagaragaje ko abanyeshuri bo mu cyiciro cya mbere cy’amashuri abanza batsinze neza isuzuma ryo gusoma no kwandika icyongereza. Naho mu isomo ry’imibare icyo kigereranyo cyari kuri 39% kivuye kuri 16%.
BLF yahuguye abarimu barenga ibihumbi 30, abayobozi b’ibigo by’amashuri 3,300, abayobozi bashinzwe uburezi mu turere twose ndetse n’abayobozi ba za TTC zihugura abarimu. BLF yatanze ibitabo by’abanyeshuri by’imibare nicyongereza mu mashuri yose uko ari 3,300 kuri buri munyenshuri. Hashyizweho amahuriro y’abakobwa Girls clubs mu mashuri yatumye abana b’abakobwa bigirira icyizere mu mitsindire yamasomo ya siyanse.
Umuyobozi mukuru wa REB Dr Nelson Mbarushimana, yashimye BLF uburyo yatanze abakozi batanu b’inararibonye bafashije mu kunoza imikorere y’ibigo bishamikiye kuri MINEDUC. Muri ubwo bufasha harimo kuvugurura za amabwiriza areba imyigirire y’abakobwa,Girls Education policy, amabwiriza arebana no guhugura abarimu ndetse narebana n’ubugenzuzi bwo mu mashuri ariyo Inspection Framework.
Umuyobozi wa BLF Silas Bahigansenga, yashimiye Leta n’abafatanyabikorwa bafashije uyu mushinga byumwihariko abarimu n’abayobozi b’ibigo by’amashuri bakomeje gushyira mu bikorwa ubumenyi bahawe. Yabasabye kuzafata neza ibikoresho bahawe no guhanahana ubumenyi muri bagenzi babo bashya mu mwuga.
Umushinga BLF usoje mu gihe Leta y’Ubwongereza itangaje ko izatanga akayabo ka miliyoni 60 z’amapound umwaka utaha azakoreshwa mu bikorwa byo guteza imbere uburezi bw’umwana w’umukobwa mu Rwanda.
Tanga igitekerezo