Abanyamakuru batagira Umupaka (reporters without Boarders), ivuga ko Ubutegetsi bw’Uburusiya bwabakuriyeho Internet.
Imiryango inyuranye n’impirimbanyi z’ubwisanzure bw’itangazamakuru bamaganye icyo gikorwa.
Uyu muryango Reporters Without Borders usanzwe ufite ibiro bikuru i Paris mu Bufaransa uvuga ko guverinema y’Uburusiya yafunze imiyoboro ijya ku rubuga rwayo muri icyo gihugu kuva taliki 18 z’ukwezi kwa kane.
Impamvu zateye Uburusiya gukora ibyo ngo uyu muryango usanga zidasobanutse, ukavuga ko ntakindi “cyaha” ufite uretse gushyira ahabona uburyo ubutegetsi bw’Uburusiya bukomeje guhohotera abanyamakuru muri icyo gihugu no muri Ukraine.
Ikindi ngo no gushyira hanze gahunda yabwo y’icengezamatwara muri rubanda.
Gufunga uyu muyoboro biriyongera ku yindi Uburusiya busanzwe bwarafunze, irenga miliyoni imwe n’ibihumbi 700 igera ku mbuga zinyuranye za interineti hirya no hino ku isi. Muri iyo harimo n’iyamakuru y’imbere mu Burusiya.
Ni mu gihe haburaga iminsi mike ngo Reporters Without Borders isohore raporo yayo ngarukamwaka igaragaza uko ibihugu byo hirya no hino ku isi bihagaze mu bwisanzure bw’itangazamakuru, ku munsi wahariwe ubwisanzure bwaryo taliki 3 z’ukwezi kwa gatanu.
Umwaka ushize, iyi raporo ngarukamwaka yashyize uburusiya ku mwanya wa 164 mu bihugu 180.
Tanga igitekerezo