Rais wa Sudan aliyeondolewa madarakani Omar al-Bashir amelazwa katika hospitali ya kijeshi katika mji mkuu Khartoum, jeshi lilithibitisha Jumatano .

Taarifa ya kijeshi ilisema al-Bashir alihamishiwa katika Hospitali ya Jeshi ya Aliaa kwa pendekezo la wafanyikazi wa matibabu katika gereza la Kober kabla ya kuzuka kwa mapigano kati ya jeshi na Kikosi cha Msaada wa Haraka (RSF).

Al-Bashir, ambaye alitawala Sudan kwa miongo mitatu, aliondolewa madarakani na jeshi mwezi Aprili 2019 kufuatia maandamano makubwa ya kupinga utawala wake.

Al-Bashir aliingia madarakani Juni 30, 1989, baada ya kufanya mapinduzi ya kijeshi dhidi ya serikali ya Waziri Mkuu Al-Sadiq Al-Mahdi, na kutawala nchi chini ya kile alichokiita "mapinduzi ya wokovu wa kitaifa".

Rais huyo wa zamani alizuiliwa katika gereza la Kober mjini Khartoum Desemba 2019 baada ya kupatikana na hatia ya ufisadi.

Wakati huo huo, mkuu wa chama tawala cha zama za Bashir Ahmed Haroun alikuwa ametoroka jela huko Khartoum.

Katika ujumbe wa video uliosambazwa kwenye mitandao ya kijamii, Haroun, anayesakwa na Mahakama ya Kimataifa ya Uhalifu (ICC) kwa uhalifu wa kivita na uhalifu dhidi ya ubinadamu, alisema kuwa alitoka katika gereza la Kober huko Khartoum kutokana na ukosefu wa usalama, maji, chakula. na matibabu.

Takriban watu 460 wameuawa na wengine zaidi ya 4,000 kujeruhiwa katika mapigano kati ya jeshi la Sudan na vikosi vya RSF tangu Aprili 15, kulingana na Wizara ya Afya.

Kulikuwa na kutoelewana kumezuka katika miezi ya hivi karibuni kati ya jeshi na wanamgambo kuhusu mageuzi ya usalama wa kijeshi. Mageuzi hayo yanatazamia ushiriki kamili wa RSF katika jeshi, mojawapo ya masuala makuu katika mazungumzo ya pande za kimataifa na kikanda kwa ajili ya mpito kwa utawala wa kiraia, wa kidemokrasia nchini Sudan.

Anadolu Agency