Perezida wa Repubulika, Paul Kagame, yageze mu Karere ka Burera, aho biteganyijwe ko aganira n’ibihumb by’abaturage byabukereye bigiye kumwakira no kumugezaho ibibazo n’inyunganizi bamwe muri bo bafite ndetse n’ibyo bishimira bamaze kugeraho.
Kuri uyu wa kabiri, itariki 07 Gicurasi nibwo byari biteganyijwe ko umukuru w’igihugu atangira uruzinduko mu turere twa Burera, Musanze, Rubavu na Rutsiro akazakomereza ku munsi wa Kabiri Mu turere twa Nyamasheke na Karongi.
Uruzinduko rwe rero mu turere dutandatu rwagombaga gutangira kuri uyu wa Kabiri rwatangiye kuri uyu wa Gatatu, itariki 08 Gicurasi ahereye mu Karere ka Burera.
Nk’uko bigaragara ku mafoto yamaze kujya ahagaragara, abaturage bo mu Karere ka Burera bazindutse ku bwinshi bagiye kwakira umukuru w’igihugu aho yageze bamwakiriza indirimbo zitandukanye nka “Rwanda Yacu”.
