Abaganga b’ikipe ya FC Barcelona bagaragaje ko Umunya-Uruguay Luis Suarez agomba kumara amezi ane hanze y’ikibuga, nyuma y’imvune yagiriye mu mukino ikipe ye iheruka gutsindwamo na Atlertico Madrid ibitego 3-2.
Ku wa gatanu w’iki cyumweru ni bwo aya makipe yombi yari yahuye, mu mukino wa Super Cup ya Espagne wabereye muri Arabie Saoudite.
Suarez yakinnye iminota yose y’uyu mukino, gusa nyuma yawo biza kugaragara ko yagize ikibazo mu ivi ry’iburyo.
Kuri iki cyumweru ni bwo uyu mugabo w’imyaka 32 y’amavuko yabazwe n’umuganga w’inzobere mu kubaga imvune witwa Ramon Cugat ukomoka muri Espagne.
Kuba Suarez agomba kumara amezi ane hanze y’ikibuga, bisobanuye ko uyu mwaka w’imikino wa 2019/2020 ushobora kurangira atongeye kugaragara mu kibuga, dore ko imikino y’amarushanwa atandukanye yo ku mugabane w’Uburayi izarangirana n’ukwezi kwa Gicurasi uyu mwaka.
Kubura Suarez ni icyuho gikomeye cyane ku ruhande rwa FC Barcelona kuko ari mu bayifatiye runini. Avunitse mu gihe iyi kipe ikomeje urugamba rwo guhanganira na Real Madrid igikombe cya shampiyona ya Espagne, ndetse ikaba inakiri mu irushanwa rya UEFA Champions league na Copa Del Rey.
