Rais Félix Tshisekedi amemstaafisha rasmi Jules Alingete Key, aliyekuwa Mkurugenzi Mkuu wa Idara ya Ukaguzi Mkuu wa Fedha (IGF) katika Jamhuri ya Kidemokrasia ya Kongo tangu mwaka 2020. Nafasi yake imechukuliwa na Christophe Bitasimwa Bahii, aliyekuwa Mkuu wa Ofisi ya Rais.
Tangazo hilo lilitolewa kupitia Redio na Televisheni ya Taifa (RTNC) siku ya Jumatano.
Katika mahojiano na vyombo vya habari, Alingete alimshukuru Rais Tshisekedi kwa imani aliyompa kwa miaka mitano aliyokuwa akiongoza IGF.
Alisema:
“Nampongeza Bwana Christophe Bitasimwa kwa uteuzi wake kama mkuu mpya wa IGF, na namtakia mafanikio. Pia namshukuru Mheshimiwa Rais wa Jamhuri kwa kuniamini kwa miaka mitano iliyopita.”
Alingete alijulikana kwa mchango wake mkubwa wakati wa awamu ya kwanza ya utawala wa Tshisekedi, hususan katika mapambano dhidi ya matumizi mabaya ya mali ya umma na rushwa. Alikuwa akizungumza vikali kwenye vyombo vya habari dhidi ya wale aliowaita “wezi wa mali ya umma.”
Wakati wa sikukuu ya Krismasi, aliwaomba wale waliobainika kuiba fedha za serikali kuacha tabia hiyo na kutubu:
“Kwa wale wote mliogundulika kuhusika na wizi—wote waliotoroka na waliokamatwa—nawaomba muache wizi wa fedha za umma na mtubu.”
Pia alijibu vitisho dhidi yake akisema:
“Wale wanaotamani nife au nifukuzwe kazi, ni vyema wakumbuke kuwa hata Yesu Kristo alikufa na akafufuka siku ya tatu. Maisha yangu yako mikononi mwa Mungu.”
Mnamo Februari 2024, alisema kuwa ukosoaji wa mara kwa mara dhidi ya IGF ni ushahidi kuwa “vita dhidi ya rushwa vinafikia malengo,” na alilaani “mapepo, njama mbaya na vitisho” vinavyolenga taasisi hiyo.
Moja ya kesi kubwa wakati wa uongozi wake ilikuwa ya mradi wa viwanda vya kilimo Bukanga Lonzo, ambapo Oktoba 2024, alimshutumu waziwazi aliyekuwa Waziri Mkuu Augustin Matata Ponyo kwa kufuja dola milioni 208 za Marekani.
