Siku ya Ijumaa, Mei 23, Rais Paul Kagame alitembelea mgodi wa Nyakabingo, uliopo katika eneo la Shyorongi, wilaya ya Rulindo.
Mgodi huu unajulikana kuwa mgodi unaotoa kiasi kikubwa zaidi cha Wolfram (Tungsteni) barani Afrika.
Wolfram ni metali nzito sana inayotumika kutengeneza vifaa vya uimara wa hali ya juu, kama ndege, magari ya kivita, satellite, bunduki, risasi, na vifaa vingine vya kijeshi na viwandani.
Wolfram ya Nyakabingo husafirishwa kwenda Austria, ambako inathaminiwa kwa ubora wake wa kipekee. Mnamo mwaka 2024, tani 1,107 zilisafirishwa.
Shughuli za mgodi huu zinaendeshwa na kampuni ya Trinity Metals Group, inayojishughulisha na uchimbaji na usindikaji wa madini.
Picha zilizochapishwa na Urais wa Rwanda kwenye mtandao wao wa X (zamani Twitter) zinaonesha Rais Kagame akiwa ndani ya mojawapo ya vichuguu vya mgodi.
Kwa mujibu wa Ofisi ya Rais, zaidi ya watu 1,800 wamepata ajira kupitia shughuli za uchimbaji na usindikaji wa madini katika mgodi huo.
Mgodi huo una vichuguu vitano, na kile kirefu zaidi kinaingia hadi mita 800 ndani ya mlima na mita 120 chini ya ardhi.
Mkurugenzi Mkuu wa Trinity Nyakabingo, Justin Uwiringiyimana, alisema hivi karibuni kuwa mgodi huo una akiba ya kutosha kuchimbwa kwa angalau miaka 40 ijayo.
