Mtume Isidore Mbayahaga, ambaye kwa sasa yuko karibu sana na serikali ya Burundi, amewataka wananchi wa nchi hiyo kuchangia fedha ili wanunulie Jeshi la Ulinzi la Taifa la Burundi (FDNB) ndege ya kivita aina ya Sukhoi-57.
Mhubiri huyo alitoa kauli hiyo katika mahojiano ya hivi karibuni na kituo kimoja cha YouTube kinachofanya kazi nchini Burundi.
Katika mahojiano hayo, aliulizwa kuhusu uwezekano wa kundi la waasi la M23 kutoka Jamhuri ya Kidemokrasia ya Kongo kuvamia Burundi katika siku za usoni. Alisema kuwa kundi hilo halina uwezo wa kuleta madhara kwa nchi hiyo.
Mbayahaga aliendelea kuwasihi Warundi kuchangia jeshi lao ili liweze kununua ndege ya kivita ya Su-57 ambayo itasaidia kulinda mipaka ya nchi.
Alisema: “Tukiungana sisi Warundi, kila kaya ikatoa Fbu 10,000 au 20,000 tukawezesha jeshi letu kununua ndege ya kivita ya Sukhoi-57 ya kulinda mipaka yetu, tunaweza kuimudu.”
Aliongeza: “Nitaomba kibali ili tuinunue, kwa sababu tuna maadui. Ninajua wengine hawana ndege kama hiyo. Nataka kuuliza bei ya ndege hiyo. Tukifanya hivyo, mwisho wa mwaka tunaweza kuwa tumeinunua ndege tatu. Ili nchi yetu ibaki na amani na usalama, ni muhimu kuinunua. Si gharama kubwa.”
Ndege aina ya Sukhoi-57 hutengenezwa na kampuni ya Sukhoi nchini Urusi. Hizi ni ndege za kisasa zaidi za kizazi cha tano zinazotengenezwa nchini humo.
Hadi sasa, hakuna nchi nyingine inayomiliki ndege hizi isipokuwa Urusi, ingawa nchi kama India na Algeria zinaripotiwa kuwa na mpango wa kuzinunua. Bei yake inakadiriwa kuwa kati ya dola milioni 80 na 110.
Mbayahaga anapendekeza Burundi inunue ndege hizi, wakati nchi hiyo haina hata ndege moja ya abiria.
