Joseph Kabila Kabange, rais wa zamani wa Jamhuri ya Kidemokrasia ya Kongo (DRC), ametuma mjumbe maalum Washington, Marekani, kueleza ajenda yake ya kisiasa, ambayo ni pamoja na kumaliza utawala wa kidikteta wa Rais Félix Tshisekedi.
Kikaya Bin Karubi, mshauri wake wa karibu, amekuwa Marekani kwa siku kadhaa tangu alipoondoka Goma.
Wakati huo huo, majadiliano ya amani kati ya Rwanda na DRC yanaendelea Washington, kabla ya kutiwa saini kwa makubaliano ya amani mwezi ujao.
Kabila yupo Goma tangu alipotoka uhamishoni, na serikali ya Kinshasa inamtuhumu kwa kushirikiana na Rwanda pamoja na waasi wa M23, ambao wako vitani dhidi ya serikali.
Ziara ya mjumbe wake imejiri wakati ambapo mpinzani mwingine maarufu, Moïse Katumbi Chapwe, pia alitembelea Marekani na kupokelewa na Wizara ya Mambo ya Nje ya Marekani.
Katika mahojiano na Jeune Afrique, Kikaya alisema kuwa yuko Marekani kukutana na wabunge wa Baraza la Wawakilishi na Seneti, wajumbe wa Baraza la Usalama la Taifa, na mashirika mbalimbali ya haki za binadamu kama Human Rights Watch.
Alisema anataka kufafanua “faida ya Kabila kurudi kwenye siasa, kutetea maslahi ya familia yake ya kisiasa, na kusaidia dunia kuelewa ukweli wa mzozo wa sasa unaoletwa na utawala uliopo.”
Aliongeza kuwa ujumbe mkuu kwa Wamarekani umetolewa katika hotuba ya hivi karibuni ya Kabila kwa raia wa Kongo kabla ya kurejea.
Pia alipeleka mpango wa amani wa Kabila, unaolenga kumaliza utawala wa mabavu.
Mnamo Mei 26, Kabila alirejea kutoka uhamishoni (aliokuwa tangu 2023) na moja kwa moja akaenda Goma, mji unaodhibitiwa na waasi wa M23.
Katika hotuba yake ya kabla ya kurudi, alisema analenga kuchangia juhudi za kumaliza utawala wa kidikteta wa Rais Félix Antoine Tshisekedi, aliyemrithi madarakani.
Mjumbe wake aliambia Jeune Afrique kuwa “malengo ya Kabila hayaendi kinyume na yale ya waasi wa M23 – wote wanataka kumaliza utawala wa kidikteta wa Tshisekedi.”
Tangu Kabila alipoeleza nia ya kwenda Goma, serikali ya DRC ilifunga mali zake zote, na ikasema itamshtaki kwa uhaini, uhalifu dhidi ya ubinadamu, na kushirikiana na kundi la kupanga mapinduzi ya serikali.
Kikaya alieleza kuwa serikali ya Kinshasa inapanga kutoa hati za kimataifa za kukamatwa kwa Kabila.
