Katika Wilaya ya Rutshuru, Mkoa wa Kivu Kaskazini nchini Jamhuri ya Kidemokrasia ya Kongo (DRC), mapigano makali yalizuka asubuhi ya leo kati ya jeshi la serikali na waasi wa M23, wanaopigania maeneo ya Kivu Kusini.
Mnamo Jumatatu asubuhi, tarehe 16 Juni 2025, mapambano yalitokea kati ya waasi wa M23 na muungano wa majeshi ya serikali ya Kongo unaojumuisha FARDC (Jeshi la Kongo), wanajeshi wa Burundi, pamoja na makundi yenye silaha kama Wazalendo, FDLR, na wanamgambo wa Imbonerakure kutoka chama tawala cha CNDD-FDD nchini Burundi.
Habari kutoka maeneo hayo zinasema mapigano yalifanyika katika maeneo ya Busumba na Bunkuba, yapata kilomita 10 kutoka Mweso Centre, ndani ya Bukombo, Chefferie ya Bwito, wilaya ya Rutshuru.
Mashuhuda wanasema milio ya silaha nzito na nyepesi ilianza kusikika kuanzia saa 12 asubuhi (6:00am) hadi karibu saa 3 asubuhi (9:00am).
Kutokana na mapigano hayo, idadi kubwa ya wakazi walikimbia makazi yao, wakielekea maeneo ya Buhumbira na sehemu nyingine za wilaya ya Masisi, inayopakana na Rutshuru na ambayo pia imewahi kushuhudia mapigano kama haya.
Mapigano ya leo yanafuatia mapambano ya wiki iliyopita, ambapo muungano wa majeshi ya serikali ya Kinshasa ulishambulia M23 lakini ulikumbana na upinzani mkali na kushindwa.
Pia, inasemekana kuwa mapambano ya wiki iliyopita huko Katsiro yalisababisha hospitali kupigwa na mabomu, na baadhi ya kuta zake kuharibiwa.
