Katika video iliyotolewa Jumapili, tarehe 22 Juni, Rais wa Gabon alitangaza kuwa atazindua rasmi chama chake kipya cha siasa siku ya Jumamosi tarehe 28 Juni, katika mkutano mkubwa wa hadhara utakaofanyika Palais des Sports, Libreville.
Brice Oligui Nguema, ambaye aligombea kama mgombea huru katika uchaguzi wa rais wa Aprili 12 na kushinda kwa kura nyingi, alitoa tamko hilo akiwa amesimama chini ya mti akiwa na kundi la wanaume na wanawake zaidi ya kumi.
“Uchaguzi mkuu mlionipa sasa unahitaji chombo cha kisiasa kitakachounganisha nguvu zote za maendeleo za taifa letu. Kwa sababu hiyo, nina heshima kuwaalika kwenye mkutano mkuu utakaoashiria mwanzo wa safari yetu Jumamosi, tarehe 28 Juni 2025, saa nne asubuhi.”
Tangazo hili lilizua maswali mengi katika ulingo wa kisiasa wa Gabon. Jean-Rémy Yama, mmoja wa wapinzani maarufu, alikosoa hatua hiyo lakini akakubali kuwa rais ana haki ya kuanzisha chama chake.
“[Mpango huu] haukuwa wa lazima kwa sababu Katiba tayari inampa Rais mamlaka yote. Hahitaji hata kuwa na wingi wa wabunge bungeni,” alisema.
Tangazo hili linakuja siku tano tu baada ya Bunge la Gabon kupitisha mnamo Jumanne tarehe 17 Juni, mswada wa sheria kuhusu vyama vya kisiasa, unaolenga kupunguza idadi ya vyama kutoka 103 hadi 3 au 4 pekee, kama ilivyopendekezwa katika mkutano wa maridhiano wa Aprili mwaka jana.
