Nyuma yo gushyikirizwa amavuriro y’ibanze (postes de santé) yuzuye mu tugari twabo, abaturage b’utugari twa Pera mu Murenge wa Bugarama na Kagara muri Gihundwe mu Karere ka Rusizi basabye ko yahabwa ingufu n’abaforomo bahoraho, ntavure uyu munsi ejo ngo usange afunze cyangwa atange serivisi zimwe ngo izindi asabwa gutanga bazibure, kuko hari aho usanga poste de santé yubakwa igashyikirizwa abaturage bibwira ko igiye kubaha serivisi mu minsi mike ikajya yirirwa ifunze imeraho ibyatsi.
Izi postes de santé bashyikirijwe zirasanga izindi 5 zirimo iya Rwanje na Bugarura mu murenge wa Nkombo, iya Turambi muri Giheke,iya Ryamuhirwa muri Nkungu n’iya Gasebeya mu murenge wa Nyakabuye, zose uko ari 7 zubatswe ku bufatanye bw’Akarere ka Rusizi n’ishyirahamwe ry’abayobozi b’uturere bavuga ururimi rw’Igifaransa ( Association internationale de Maires francophones) zose zikaba zaratangiye gukoreshwa mu rwego rwo kwegereza abaturage serivisi z’ubuzima kuko zamaze kugezwamo ibikenewe byose ngo zihe abaturage serivisi bazifuzaho, nk’uko bivugwa n’umukozi w’Akarere ushinzwe guteza imbere ubuzima no gukumira indwara ku rwego rw’aka karere Habarugira Wencesilas.
Ati : «Zose zatangiye gukora zitangirira ku gikorwa kijyanye na serivisi zo kuboneza urubyaro no gusuzuma indwara zitandura, aho abakozi bo ku bigo nderabuzima ndetse n’abo ku bitaro bizifite mu nshingano, baba bashobora kuboneka bajya gusuzumirayo abaturage ku ngengabihe iba yatanzwe,n’izindi serivisi nko gukingira, igipimo cy’ababyeyi batwite zirahatangirwa, ariko rimwe mu cyumweru cyangwa 2 bitewe n’uko abaganga baboneka. »
Yakomeje ati : « Hashobora no gukorerwa serivisi zo kuvura bisanzwe nk’abarwaye inkorora,malariya,inzoka zo mu nda, n’izindi serivisi ,ku buryo abaturage bajyayo bagahabwa izo serivisi,icyo gihe bikorwa n’ikigo nderabuzima. Na ho kuboneza urubyaro no gusuzuma indwara zitandura akenshi hifashishwa abakozi bo mu bitaro badufasha mu kunganira ibigo nderabuzima mu gutanga izo serivisi.’’
Avuga ko mbere yo kuziha abaturage bamwe bahererwaga serivisi zimwe na zimwe z’ubuzima mu biro by’utugari ugasanga gutandukanya uwaje kwivuza n’uwaje gushaka izindi serivisi zo ku kagari bigorana, bikaba byanabangmira byinshi birimo n’ibanga ry’umurwayi na muganga ritagomba kumenywa n’ubonetse wsese cyangwa uwiyiziye mu zindi serivisi,,icyerekezo kikaba ko mu minsi iri imbere zizajya zitanga serivisi buri munsi kuko hari gahunda yo kuzegurira abikorera ngo zibashe gutanga umusaruro zitezweho.
Umwe mu baturage bazishyikirijwe ati : « Tuzihawe tuzikeneye kuko byatugoraga kugera ku kigo nderabuzima kubera urugendo rurerure dukora bigatera bamwe kutivuza uko byagakwiye ari yo mpamvu hari serivisi zimwe z’ubuzima twahererwaga mu biro by’akagari na byo ugasanga bidafututse, ariko turasaba ko tutatahira kuzifotorezaho ngo tuzategereze serivisi duhebe, nk’uko hari aho tubibona ugasanga poste de santé yamezeho ibyatsi ,ikingurwa rimwe mu cyumweru ikora bya nyirarureshwa, tugasaba ko ibyo bitaba kuri izi duhawe.’’
Kuri iki uyu Habarugira Wencesilas , umukozi w’Akarere ushinzwe guteza imbere ubuzima no gukumira indwara avuga ko kiri gukemurwa kuko byaterwaga n’uko hari postes de santé usanga zubatse ahatorohereza abikorera bakanga kuzikoreramo cyangwa zizatanga serivisi ku baturage bacye cyane uwayikoreramo akabona yahomba zikamera nk’izipfuye ubusa, bkaba bari kubishakira ingamba zo kubikemura burundu.
Akarere ka Rusizi gafite postes de santé 52 gusa mu gihe muri buri kagari katubatsemo ikigo nderabuzima cyangwa ibitaro yagombye kuba ihari, utugari 20 tukaba tutarazibona, muri ziriya 52 izikora zikaba ari 36 gusa zirimo 14 ziri mu maboko y’abikorera, izindi 16 zisigaye ngo ntizikorerwamo kuko zimwe ari bwo zicyuzura izindi zigishakirwa ibikoresho ngo zitangire gukorerwamo, icyakora ngo hari serivisi zimwe na zimwe zishobora gutangirwamo rimwe na rimwe.
Umuyobozi w’aka karere, Kayumba Ephrem, yasabye aba bazibonye kuzikoresha neza, kwitabira gutanga mituweli kugira ngo biborohere kubona serivisi z’ubuvuzi no gukomeza ingamba zo kwirinda icyorezo cya COVID-19.
