Bamwe mu batuye mu Ntara ya Cibitoke iherereye mu majyaruguru y’uburengerazuba bw’u Burundi, barasaba ko umupaka wa Ruhwa ubahuza n’u Rwanda wafungurwa kugira ngo ibikorwa by’ubuhahirane bisubukurwe.
Abaganiriye na Radiyo na Televiziyo Isanganiro dukesha iyi nkuru, batangaje ko ifungwa ry’uyu mupaka ryabateye ubukene kuko ryahagaritse bikorwa bitandukanye byababeshagaho birimo ubucuruzi bwambukiranya umupaka.
Bavuga ko usibye ubuhahirane bwasubukurwa, ubukene bukagabanyuka, imigenderanire hagati y’Abarundi n’Abanyarwanda nayo yakongera kumera neza.
Aba Barundi basabye Leta gufungura uyu mupaka nyuma y’aho mu ntangiriro z’uku kwezi ifunguye undi wa Gatumba uhuza igihugu cyabo na Repubulika ya Demukarasi ya Congo, wari warafunzwe mu rwego rwo gukumira ikwirakwira ry’icyorezo cya Covid-19.
Imigenderanire n’ubuhahirane ku mupaka wa Ruhwa byakomwe mu nkokora n’umubano w’ibihugu byombi utameze neza kuva mu 2015, hikubitiraho ingamba zafashwe mu kwirinda icyorezo cya Covid-19.
Kurikira ibiganiro n’amavidewo binyura kuri Bwiza TV
