Ingabo za Kenya zigize umutwe wa QRF (Quick Reaction Force) kuri uyu wa 15 Kamena 2021 zamaze koherezwa mu butumwa bwo kugarura amahoro n’umutekano mu burasirazuba bwa Repubulika ya Demukarasi ya Congo (RDC) ziyobowe na Lieutenant-Colonel Abdul Galgalo.
Nk’uko igisirikare cya Kenya (KDF) cyabitangaje, mbere y’uko zifata urugendo zerekeza muri RDC, zasuwe n’Umugaba Mukuru, Gen. Robert Kibochi, aziha ibendera ry’igihugu, azisaba kugaragaza umurava, ikinyabupfura no kubanira neza Abanyekongo mu gihe zizaba ziri mu butumwa bw’amahoro.
Gen. Kibochi yagize ati: “Nta mpungenge mfite kandi nizeye ko mwiteguye gutumika nkurukije uko nababonye mu myitozo mwakoreye kuri Mt. Kenya. Nizeye ko mwiteguye kurinda Abanyekongo. Mugiye muri Congo guhagararira igihugu cyacu ni yo mpamvu tubahaye ibendera ry’igihugu, muzarisubiza ubutumwa mugiyemo burangiye.”
Izi ngabo ziriyunga n’umutwe witwa FIB (Force Intervention Brigade) uhuje ingabo zidasanzwe z’ibihugu bitandukanye, zishinzwe kongerera imbaraga iz’Umuryango w’Abibumbye ziri mu butumwa bw’amahoro muri RDC (MONUSCO).
Inkuru bifitanye isano https://bwiza.com/?Kenya-igiye-kohereza-ingabo-zidasanzwe-mu-burasirazuba-bwa-RDC
KDF ivuga ko QRF irakorera ubutumwa mu gace ka Mavivi, Teritwari ya Beni mu Ntara ya Kivu y’Amajyaruguru, hamwe mu hafatwa nk’ibirindiro by’umutwe witwaje intwaro wa ADF.
Amafoto: KDF
Kurikira ibiganiro n’amavidewo binyura kuri Bwiza TV
