Umuhanzi wo muri Tanzania, Ally Saleh Kiba uzwi nka Alikiba na mugenzi we wo muri Nigeria wahoze mu itsinda rya P-Square, Paul Okoye uzwi nka Rudeboy, bagarageye mu isura y’abakomando.
Amafoto aba bahanzi bashyize ku mbuga nkoranyambaga zabo, abagaragaza mu bihe bitandukanye, bambaye imyambaro ya gisirikare, bameze nk’abari ku rugamba.
Aya mafoto yafatiwe mu mashusho atarajya hanze y’indirimbo ‘Salute’ aba bahanzi bahuriyemo.
Alikiba mu butumwa yashyize ku mbuga ze, yashimiye abafana bagize uruhare mu iterambere ry’umuziki we, mu buryo bwo kubasaba gukomeza kumushyigikira.
Yagize ati: “Bafana mwabaye ibitangaza mu rugendo rwanjye rw’umuziki, mwaramfashije cyane. Muri igisobanuro nyakuri cy’abafana biri mu maraso. Nta magambo nabona yasobanura uburyo nishimye. Ntacyo nakora keretse kubaha ‘Salute’ mwese. Iyo mutahaba, ibyinshi ntibyari gushoboka muri uru rugendo rw’umuziki. Mwese mbahaye isaluti (Salute).”
Iyi ndirimbo yasohotse mu buryo bw’amajwi kuri uyu wa 24 Kamena 2021. Aba bahanzi bateguje ko amashusho yayo asohoka bidatinze.
Kurikira ibiganiro n’amavidewo binyura kuri Bwiza TV
