Umuryango w’abaganga muri Uganda, UMA, uvuga ko mu byumweru bibiri bishize, abaganga 16 bishwe n’icyorezo cya Covid-19.
Umunyamabanga Mukuru wa UMA, Dr Mukuzi Muhereza yabitangarije mu kiganiro yagiriye kuri Radio Capital FM kuri uyu wa 3 Nyakanga 2021.
Dr Muhereza yavuze ko izi mfu zatewe n’uko abaganga bahura cyane n’abarwayi b’iki cyorezo, hakiyongeraho ikibazo cyo kubura ubwirinzi bwakibakingira.
Yavuze kandi ko umubare uri hejuru yongeyemp n’abavuzi basanzwe batari ku rwego rwa Dogiteri bapfuye bazize iki cyorezo mu byumweru bibiri bishize.
Aba ba Dogiteri n’abavuzi basanzwe bishwe n’iki cyorezo mu gihe muri iyi minsi Uganda yugarijwe bikomeye na Covid-19 cyane cyane iyihinduranyije yahawe izina rya Delta, iyi ikaba yarabonetse bwa mbere mu Buhinde.
Mu kwezi gushize, ibitangazamakuru byavugaga ko iki cyorezo cyarenze ubushobozi bwa bimwe mu bitaro bikuru.
Imibare ya Minisiteri y’Ubuzima yerekana ko kugeza tariki ya 1 Nyakanga 2021 muri Uganda hari hamaze kubarurwa abantu 82,852 banduye Covid-19 barimo 54,845 bakize. Abapfuye ni 1910 barimo 37 babonetse uwo munsi.
