Umuvugizi wa operasiyo Sokola 2 ikorwa n’ingabo za Repubulika ya Demukarasi ya Congo (RDC) igamije kurandura imitwe yitwaje intwaro mu ntara ya Kivu y’Amajyaruguru, Maj. Njike Kaiko yatangaje ko hari abandi barwanyi barambitse intwaro barimo aba FDLR irwanya Leta y’u Rwanda.
Aya makuru akubiye muri raporo y’iyi operasiyo yo kuva tariki ya 20 Kamena 2021 Maj. Njike yagezaga kuri Guverineri w’iyi ntara, Lt. Gen. Ndima Constant kuri uyu wa 10 Nyakanga.
Maj. Njike yatangarije Gen. Ndima ko aba barwanyi barambitse intwaro barimo 7 ba Nyatura na APCLS na 6 ba FDLR, bose bakaba barakoreraga muri Teritwari ya Masisi.
Yamurikiye kandi Gen. Ndima ubwoko butandukanye bw’intwaro 81 z’abarwanyi b’iyi mitwe yitwaje intwaro zafatiwe muri Operasiyo Sokola 2 kuva tariki ya 20 Kamena 2021.
Aba barwanyi ba FDLR barambitse intwaro nyuma y’abandi babiri bazirambitse hagati muri Kamena 2021. Abo hamwe n’abandi babarirwa mu 100 b’indi mitwe bashyikirijwe ubuyobozi bw’intara tariki ya 21 Kamena.
Ubuyobozi bw’intara bushingiye ku byo ingabo za Leta zimaze kugeraho kuva yashyirwa mu bihe bidasanzwe tariki ya 6 Gicurasi, bufite icyizere cyo kurandura burundu iyi mitwe yitwaje intwaro bidatinze.
Nko muri Masisi, Maj. Njike yavuze ko ingabo za Leta ubu ziri kuhagenzura ku kigero cya 80%, ubu gahunda ikaba ari ugukaza operasiyo no muri teritwari ya Walikale na Rutshuru; aho FDLR yakunze kumvikana kuva yabaho.
