Polisi ya Uganda yataye muri yombi umusore w’imyaka 25 y’amavuko wo mu Karere ka Luwero witwa Jamilu Ssekyondwa, akaba yashakishwaga nyuma yo kubeshya ko Umukuru w’Igihugu, Perezida Yoweri Museveni yapfuye.
Umuyobozi wa Polisi ya Luwero w’agateganyo, Patrick Maikula yabwiye itangazamakuru ko uyu musore yatawe muri yombi, hifashishijwe ubutumwa n’ibiganiro yagiriye ku rubuga rwa WhatsApp.
Maikula yavuze ko Ssekyondwa ari umwe mu rubyiruko rwayobotse ishyaka NUP ritavuga rumwe n’ubutegetsi ryahimbaga rukanakwirakwiza ibihuha ku mbuga nkoranyambaga.
Ssekyondwa yatawe muri yombi bisabwe na Perezida Museveni, nyuma y’iminsi mike igihuha cy’uko yapfuye gikwirakwiye. Yagize ati: “Imbuga nkoranyambaga zimaze igihe zivuga ko Museveni yapfuye…Inzego z’umutekano zikwiye gushakisha zikamenya vuba aho umuntu uvuga ziriya nkuru aherereye.”
Ubu afungiwe kuri sitasiyo ya Polisi ya Luwero, akurikiranweho ibyaha bibiri: kwibasirana hifashishijwe ikoranabuhanga no gukoresha mudasobwa mu buryo butemewe.
