Umutwe witwaje intwaro wa TPLF uharanira ubwigenge bwa Leta ya Tigray uvuga ko warekuye abasirikare1000 ba Leta ya Ethiopia mu babarirwa mu 6000 wari warafashe mpiri.
Byatangajwe n’umuyobozi w’ishyaka rya TPLF, Debretsion Gebremichael mu kiganiro yagiranye n’ibiro ntaramakuru by’Abongereza, Reuters, kuri uyu wa 17 Nyakanga 2021.
Gebremichael yavuze ko abasirikare bafite amapeti mato ari bo barekuwe, abandi bakuru babarirwa mu 5000 bo bakaba bakiri mu maboko yabo, mu gihe bategereje kuburanishwa, gusa ibyaha bakurikiranweho ntibiramenyekana.
Yagize ati: “Abarenga 5000 turacyabafite, abofisiye bakuru tuzabagumana, bakurikiranwe n’ubutabera.”
Gebremichael yavuze kandi ko aba basirikare barekuwe boherejwe mu karere ka Amhara gahana imbibi na Tigray, gusa ubuyobozi bwaho bwatangarije Reuters ko ntabyo buzi, uwabakiriye ntazwi na Leta ya Ethiopia nayo ntacyo irabivugaho.
Abarwanyi ba TPLF bafatiye mpiri aba basirikare mu rugamba rwo kubohora Tigray yari yarafashwe na Leta ya Ethiopia, mu mpera za Kamena 2021. Nyuma yo kubafata, babazengurukije umurwa mukuru w’iyi Leta, Mekelle mu kwerekana ko ibyo bavuga ari impamo.
