Ubuyobozi bwa Leta ya Amhara ihana imbibi na Tigray muri Ethiopia, burahamagarira urubyiruko rwose gufata intwaro, rugahangana n’umutwe witwaje intwaro wa TPLF.
Uru rubyiruko rwahamagawe na Perezida wa Amhara, Agegnehu Teshager kuri uyu wa 25 Nyakanga 2021, agira ati: “Ndahamagarira urubyiruko rwose, ururi mu mitwe yitwaje intwaro n’urutayirimo, urufite intwaro za Leta n’urufite intwaro zarwo bwite kwihuriza mu rugamba rwo kurwanya TPLF guhera ejo.”
Nk’uko VOA yabitangaje, Agegnelu yahamagariye urubyiruko guhaguruka, rukarwanya TPLF kubera ko uyu mutwe uharanira ubwigenge bwa Tigray ukomeje intambara kuri Leta.
Mu mpera z’ukwezi gushize ni bwo ubuyobozi bwa TPLF bwatangaje ko abarwanyi bawo bigaruriye umujyi wa Mekelle ufatwa nk’umurwa mukuru wa Tigray wari warafashwe n’ingabo za Ethiopia, bunerekana ibihumbi by’ingabo z’iki gihugu zafashwe mpiri.
Mu buryo buteruye, nyuma y’aho Minisitiri w’Intebe, Abiy Ahmed yatangaje ko Leta ya Ethiopia [yari isa n’iyatsinzwe urugamba] yafashe icyemezo cyo kujya mu bihe byo guceceka, nk’umwanya wo kwitekerezaho.
Gusa Minisitiri Abiy yafashe iki cyemezo ubwo yabonaga ko TPLF nabo basa n’abahagaritse iyi mirwano, gusa aba barwanyi baciye inyuma basubukura urugamba, batangira kugaba ibitero ku ngabo za Leta ya Ethiopia muri Leta ya Afar yegereye Tigray, bafite gahunda yo gukomereza muri Amhara.
Kuri uyu wa 24 Nyakanga 2021, Umuyobozi w’ingabo zidasanzwe muri Amhara, Brig. Gen. Tefera Mamo yatangaje ko abarwanyi ba TPLF bamaze muri iyi Leta.
Gen. Tefera yagize ati: “Umutwe w’iterabwoba watangije intambara muri Amhara no muri Afar…Ingabo zidasanzwe za Amhara ziri kuwurwanya zifatanyije n’izindi nzego z’umutekano.”
Ibitero TPLF yatangije muri Amhara ni byo bitumye Agegnehu ahamagarira urubyiruko rwose guhaguruka rukarwanya uyu mutwe witwaje intwaro.
