Abandi barwanyi barenga 90 b’umutwe witwaje intwaro wa APCLS bakoreraga muri Teritwari ya Masisi, Intara ya Kivu y’Amajyaruguru muri Repubulika ya Demukarasi ya Congo (RDC), barambitse intwaro, bishyikiriza igisirikare cya Leta.
Igikorwa cyo kumurikira aba barwanyi ubuyobozi n’abaturage bo muri Masisi cyayobowe na Gen. Mweshu Lumbu uyobora operasiyo Sokola 2 muri iyi ntara, ku wa 26 Nyakanga 2021.
Umuvugizi wa Sokola 2, Maj. Ndjike Kaiko yatangaje ko aba barwanyi barambitse intwaro bitewe n’igitutu bakomeje gushyirwaho n’igisirikare cya Leta, kibagabaho ibitero ndetse n’umuhamagaro w’ubuyobozi bukuru bwabasezeranyije kubafasha gusubira mu buzima busanzwe mu gihe baba babyemeye.
Maj. Kaiko yavuze ko hari icyizere ko mu minsi mike, n’umuyobozi mukuru wa APCLS witwa Janvier Karairi arambika intwaro nk’abarwanyi be.
Aba barwanyi barambitse intwaro bakurikiye abandi barenga 100 nabo ba APCLS bari bayobowe n’uwitiya Gen. Paul Maheshe bamurikiwe ubuyobozi n’abaturage ba Masisi tariki ya 22 Nyakanga 2021.
