Angola izohereza abasirikare 20 muri Mozambique

Ni icyemezo cyafashwe hashingiwe ku cyifuzo Perezida wa Angola akaba n’Umugaba w’Ikirenga w’ingabo, João Lourenço yagejeje ku bagize Inteko.

Iri tsinda ry’abasirikare rizoherezwa muri Mozambique nk’umusanzu wo kubungabunga amahoro n’umutekano Angola izaba itanze mu muryango w’ibihugu biri mu majyepfo ya Afurika, SADC.

Igitangazamakuru Xinhua kivuga ko iri tsinda rizaba rigizwe n’abasirikare badasanzwe (special force) 8 n’10 bazajya batwara indege ya Illyushin IL-76, abandi babiri bazajya mu rwego rwa SADC rushinzwe gukurikirana ikibazo cy’umutekano muri Cabo Delgado.

Ni mu gihe ibindi bitangazamakuru mpuzamahanga bivuga ko aba basirikare bose uko ari 20 bazajya muri Mozambique nk’abajyanama bazafasha ingabo z’iki gihugu guhashya abarwanyi b’umutwe w’iterabwoba wegamiye kuri Isilamu umaze imyaka itatu uhungabanya umutekano wa Cabo Delgado.

Ibihugu bimaze kohereza ingabo muri Mozambique birimo u Rwanda rwoherejeyo abasirikare n’abapolisi bose 1000, Botswana yoherejeyo abasirikare 396 tariki ya 26 Nyakanga, Portugal yoherejeyo 60 na Afurika y’Epfo bitaramenyekana umubare w’abo imaze kohereza (gusa yemeza ko kugeza tariki ya 15 Ukwakira 2021 izaba imaze koherezayo 1495.)

Angola yo izohereza aba basirikare tariki ya 6 Kanama 2021, bikaba biteganyijwe ko bazamarayo amezi atatu. Ubutumwa bwabo bwagenewe ingengo y’imari y’amadolari ya Amerika 575,500.