Kuva muri Gicurasi kugeza muri uku kwezi kwa Kanama 2021, u Rwanda rumaze gusurwa n’abasirikare bakuru baturutse mu bihugu bitanu.
Izi nzinduko zatangiye tariki ya 8 Gicurasi 2021 ubwo Umugaba Mukuru w’Ingabo za Repubulika ya Centrafurika, Maj. Gen. Zephlin Mamadou yasuraga iki gihugu aherekejwe n’itsinda ry’impuguke mu bya gisirikare.
Muri uru ruzinduko Gen. Zephlin n’iri tsinda bamazemo icyumweru, baganiriye n’ingabo z’u Rwanda ku masezerano y’ubufatanye mu bya gisirikare ibihugu byombi byasinye mu Kwakira 2019.
Hakurikiyeho urwo Umugaba Mukuru w’Ingabo za Misiri, Lt. Gen. Mohamed Farid n’itsinda ryamuherekeje bagiriye muri iki gihugu tariki ya 28 Gicurasi 2021.
Gen. Farid n’iri tsinda, basuye ibiro bikuru by’ingabo z’u Rwanda, banaganira na Minisitiri w’Ingabo, Maj. Gen. Albert Murasira. Ibiganiro impande zombi zagiranye birebana no gukomeza ubufatanye busanzwe buriho.
Itsinda ry’abanyeshuri 28 ku rwego ofisiye mu ishuri rya gisirikare ryo muri Nigeria ryari riyobowe na Brig. Gen. Aniedi Edet ryasuye u Rwanda kuva tariki ya 12 kugeza ku ya 19 Kamena 2021.
Iri tsinda ryasuye ibiro bikuru by’ingabo z’u Rwanda ku Kimihurura, risobanurirwa imikorere yabyo. Ryanaganiriye n’Umugaba w’Ingabo zirwanira ku butaka, Lt. Gen. Mubarakh Muganga.
Guhera tariki ya 20 kugeza ku ya 24 Kamena 2021, itsinda ry’abanyeshuri bo ku rwego rw’abosifiye bakuru 47 mu ishuri rikuru rya gisirikare rya Bangladesh bari bayobowe na Maj. Gen. Ashraful Islam bari mu Rwanda. Nabo bari baje gufatira amasomo ku iterambere ry’igisirikare cy’igihugu.
Kuva tariki ya 26 kugeza ku ya 30 Nyakanga 2021, Umugaba Mukuru w’Ingabo za Angola, Gen. António Egídio de Sousa Santos yari mu Rwanda mu ruzinduko rw’akazi.
Muri uru ruzinduko, Gen. António yakiriwe n’Umugaba w’Ingabo z’u Rwanda, Gen. Jean Bosco Kazura na Minisitiri w’Ingabo, Maj. Gen. Albert Murasira. Bagiranye ibiganiro birebana n’ubufatanye mu iterambere ry’ibisirikare by’ibihugu byombi.
Kuva umwaka watangira, hari abandi batari abasirikare basuye u Rwanda ari bari muri gahunda yo gukomeza ubufatanye mu iterambere ry’ibisirikare barimo itsinda ryari riyobowe Intumwa Yihariye ya Perezida wa Repubulika ya Demukarasi ya Congo, François Beya usanzwe ari n’umujyanama we mu bya gisirikare. Uru ruzinduko rwamaze iminsi 3 rwatangiye tariki ya 12 Gashyantare 2021.
Minisitiri w’Ingabo za Zimbabwe, Hon. Muchinguri Kashiri ni we uheruka mu Rwanda, aho yagize uruzinduko rw’iminsi ibiri rwatangiye tariki ya 2 Kanama 2021. Narwo rwari rwerekeye ibiganiro by’ubufatanye mu gukomeza guteza imbere ibisirikare by’ibihugu byombi.
