Ambasade ya Leta Zunze Ubumwe za Amerika muri Repubulika ya Demukarasi ya Congo (RDC) yatangaje ko itsinda ry’abasirikare b’igihugu cye bashinzwe ibikorwa bidasanzwe ritegerejwe mu burasirazuba bw’iki gihugu bumaze igihe kirekire burangwa n’ibibazo by’umutekano muke.
Itangazo rigenewe itangazamakuru iyi Ambasade yasohoye kuri uyu wa 13 Kanama 2021, rivuga ko iri tsinda riragirira uruzinduko mu burasirazuba bw’iki gihugu mu minsi iri imbere, hashingiwe ku masezerano Guverinoma zombi zagiranye.
Iri tsinda ngo rizasura uburasirazuba bwa RDC mu rwego rw’ubufatanye bw’ibihugu byombi mu kugarura amahoro, umutekano, iterambere no kubungabunga ibidukikije by’umwihariko Pariki n’amashyamba by’igihugu.
Ku kijyanye n’umutekano, Guverinoma ya RDC n’iya USA zemeranyije ubufatanye mu kugarura amahoro n’umutekano mu burasirazuba, no kurwanya umutwe w’iterabwoba wegamiye kuri Isilamu wa DAESH-DRC, usanzwe uzwi nka ADF.
Muri uru ruzinduko, iri tsinda rizifatanya na Minisiteri y’Ingabo n’igisirikare cya RDC mu gusuzuma uko igikorwa cyo kurwanya ibikorwa by’iterabwoba n’ibindi biteza umutekano muke kizagenda.
Nyuma y’isuzuma, iri tangazo rivuga ko iri tsinda rizafatanya n’ubuyobozi bw’ingabo bwa RDC gushyiraho itsinda rizaba rifite inshingano ryo kurwanya ibi bikorwa by’iterabwoba, rikagarura amahoro n’umutekano ku nyungu z’Abanyekongo.
