Umuvugizi w’ibikorwa by’igisirikare cya Repubulika ya Demukarasi ya Congo (RDC) mu ntara ya Kivu y’Amajyepfo, Capt. Dieudonné Kasereka yatangaje ko ingabo z’igihugu, FARDC, zafashe ibirindiro bikuru by’abarwanyi ba Col. Michel Rukunda (Makanika) mu gace ka Kamombo.
Capt. Kasereka yabwiye itangazamakuru ati: “Turi muri Kamombo mu birindiro bikuru bya Col. Makanika n’abo bifatanyije.”
Ibi birindiro bifashwe nyuma y’iminsi ibiri FARDC ihanganye n’imitwe yitwaje intwaro ya Twirwaneho na Gumino ivugwaho kuyoborwa na Col. Makanika.
FARDC yabigezemo ku Cyumweru tariki ya 15 Kanama 2021 saa kumi n’imwe z’umugoroba. Bivugwa ko Col. Makanika n’abarwanyi be bahungiye mu ishyamba rya Bijabo.
Col. Makanika yahoze ari umusirikare mukuru muri FARDC, atoroka mu mpera z’2019. Icyo gihe yabwiye itangazamakuru ko agiye gutabara bene wabo b’Abanyamulenge bakomeje kwicwa n’imitwe yitwaje intwaro ya Mai Mai bigizwemo uruhare na bamwe mu basirikare ba Leta.
