Musanze: Umushoramari yiyemeje kuzamura impano z’abahanzi n’abakinnyi ba filimi

Rayan nk’uko yabitangarije mu kiganiro yagiranye n’itangazamakuru tariki ya 13 Kanama 2021, azajya afasha aba bahanzi abinyujije mu ishami rya The Rayan Music Entertainment, afashe abakinnyi ba filimi abinyujije muri The Rayan Film Corner; amashami yombi yafunguye ku mugaragaro uwo munsi.

Iki kiganiro cyitabiriwe n’abahanzi barimo umuraperi Maylo wamamaye cyane muri Musanze, Kamayiresi Erasme wigisha umuziki mu ishuri ry’umuziki n’ubugeni rya Nyundo n’abanyamakuru b’imyidagaduro.

Ku ikubitiro, Rayan yamaze gusinyana amasezerano y’imikoranire y’imyaka ine n’abakobwa babiri b’abanyempano mu muziki: Jolie Sharangabo wamaze gushyira hanze indirimbo ‘Irya Mukuru’ na Uwase Jennifer uzwi nka Jenny 9 wamaze gushyira hanze indirimbo ‘I’m Alone’.

Kanda hano wumve Irya Mukuru ya Jolie

Umva I’m Alone ya Jenny 9 kanze hano

Uyu mushoramari usanzwe ari inararibonye mu bikorwa by’umuziki na filimi, yasobanuriye itangazamakuru ko yafashe icyemezo cyo gufungura ikigo gifasha aba banyempano nyuma y’ibiganiro mpaka byari bimaze igihe bitambuka ku bitangazamakuru, byibaza impamvu badatera imbere kandi bigaragara ko bahari kandi bashoboye.

Abitabiraga ibi biganiro benshi bagushaga ku mwanzuro w’uko kubura kw’abashora imari muri izi mpano, bakazifasha kuzamuka cyane ko usanga ba nyirazo baba nta n’ubushobozi bafite; ari cyo gituma zizima mu gihe zitangiye kumurika.

Ku kijyanye n’amasezerano Rayan yagiranye n’aba bahanzi babiri, yavuze ko yiteguye gushyira mu bikorwa ibikubiyemo byose, cyane ko amaze igihe kirekire abitegura. Ati: “Nta muntu ukwiye kugira impugenge kuko gusinyisha aba bahanzi ni bintu nateguye igihe kirekire kandi nzakora ibyo nsabwa byose igihe cyose nzaba nitwa umuyobozi wabo”.

Mu byo yiyemeje, harimo kubafasha mu buryo bw’amafaranga, indirimbo zabo zigatunganywa mu buryo bw’amajwi n’amashusho, yifashishije abayatunganya (producers) bashoboye, bamamaye ku rwego rw’igihugu.

Uretse The Rayan Music Entertainment na The Rayan Film Corner, The Rayan Business Group ifite irindi shami ryitwa The Rayan TV Show rizajya ritegura, ritunganya rinatambutse ibiganiro mu buryo bw’amashusho ku rubuga rwa YouTube. Ni narwo ruzajya rutambukaho indirimbo na filimi z’abafitanye amasezerano n’uyu mushoramari.