Umunyamabanga Mukuru muri Minisiteri y’Ububanyi n’Amahanga ya Kenya, Macharia Kamau yatangaje ko nta bufasha guverinoma izaha abenegihugu babuze uko bava muri Afghanistan nyuma y’aho Abatalibani bafashe ubutegetsi.
Ubwo Abatalibani bafataga ubutegetsi tariki ya 15 Kanama 2021, abenshi barimo abanyamahanga batangiye gushaka uko bava muri Afghanistan, aho ku kibuga cy’indege mpuzamahanga cya Kabul hagaragaye abirukanka ku ndege zihaguruka, abandi bazurira mu kavuyo kenshi ntacyo batinya.
Indege y’igisirikare cya Leta Zunze Ubumwe za Amerika kirwanira mu kirere, yagaragayemo ikivunge cy’abantu babarirwa muri 700 bashaka kuva muri iki gihugu, bitewe n’uko batizeye umutekano wabo mu gihe kiri mu maboko y’Abatalibani.
Mu bakoze ibishoboka ngo bave muri iki gihugu, harimo Abanyakenya bivugwa ko bagera mu 10 ariko ntibyabakundiye. Basabye Guverinoma yabo kubafasha, gusa Makau mu itangazo yageneye itangazamakuru kuri uyu wa 18 Kanama 2021 yavuze ko nta mikoranira mu bya dipolomasi ibihugu byombi bifitanye, yakabaye ishingirwaho bafashwa gutaha.
Yagize ati: “Icya mbere, Kenya nta bayihagarariye mu bya dipolomasi muri Afghanistan. Icya kabiri, iki gihugu kimaze igihe kirekire nta mutekano urimo, ntabwo twari twiteze ko Abanyakenya bajyayo.”
Kamau yavuze ko igishoboka ari uko aba Banyakenya bafashwa kuva muri Afghanistan n’ababahaye akazi, cyane nk’abakorera umuryango mpuzamahanga uharanira iyubahirizwa ry’amategeko, IDLO.
Uyu muryango ngo Guverinoma yamaze no kuwandikira, iwusaba ko wafasha abakozi bawo b’Abanyakenya kuva muri iki gihugu.
