Hakainde Hichilema watorewe kuyobora Repubulika ya Zambia, yatumiye abatavuga rumwe n’ubutegetsi bw’ibihugu byo mu karere benshi mu muhango w’irahira rye uraba kuri uyu wa 24 Kanama 2021.
Hichilema wari umaze igihe kirekire yari amaze atavuga rumwe n’ubutegetsi bwa Zambia muri uyu muhango, AFP ivuga ko yatumiye abarimo umunyapolitiki ukomeye utavuga rumwe n’ubutegetsi bwa Zimbabwe, Nelson Chamisa na Dumelang Sleshando wo muri Botswana.
Mu bandi bavugwa yatumiye harimo uturuka muri Tanzania, Uganda nka Bobi Wine, Kenya nka Raila Odinga; gusa nta makuru yemeza niba baraboneka muri uyu muhango.
Hichilema kandi yatumiye abakuru b’ibihugu barenga 10, barimo Mokgweetsi Masisi wa Botswana wageranye na Sleshando muri Zambia bari mu ndege imwe na Samia Suluhu Hassan wa Tanzania uri mu nzira yerekeza muri Zambia.
Tariki ya 12 Kanama 2021 ni bwo Hichilema yatsinze aya matora yari ahanganiyemo na Perezida Edgar Lungu, nyuma y’inshuro eshanu yari yarabigerageje atsindwa.
