Ubuyobozi bw’Abatalibani baherutse gufata ubutegetsi bwa Afghanistan bwategetse ingabo z’amahanga kuva muri iki gihugu bitarenze tariki ya 31 Kanama 2021.
Ni ubutumwa bwatanze nyuma y’aho Perezida wa Leta Zunze Ubumwe za Amerika, Joe Biden ku wa 22 Kanama yatangaje ko ingabo z’igihugu cye zishobora kuguma muri Afghanistan kugira ngo zikomeze zifashe Abanyamerika gutaha.
Igitekerezo cya Perezida Biden cyashyigikiwe n’u Bwongereza, bikaba byitezwe ko mu nama idasanzwe irahuza ibihugu 7 bikize ku Isi (G7) kuri uyu wa 24 Kanama 2021, Minisitiri w’Intebe Boris Johnson yongera kubimusaba.
Umuvugizi w’Abatalibani, Suhail Shaheen yatangarije Sky News ko umugambi wa USA n’u Bwongereza wo kuba igumishije ingabo muri Afghanistan uzateza ibibazo, ko ndetse uzatuma impande zombi zitakaza ukwizerana.
Shaheen yagize ati: “Niba US n’u Bwongereza bashaka kongera igihe cyo kuvana [abantu muri Afghanistan], igisubizo ni oya. Hazabaho ingaruka.”
USA ivuga ko byari gushoboka ko gahunda yo kuvana Abanyamerika muri Afghanistan irangira bitarenze uku kwezi, gusa ngo imbogamizi zihari ni uko abenshi bifuza kuva muri iki gihugu ari abanya-Afghanistan kandi nabo ingabo zayo ziri kubafasha.
