Umugaba Mukuru w’ingabo za Repubulika Yunze Ubumwe ya Tanzania, General Venance Mabeyo n’itsinda ayoboye kuva kuri uyu wa 23 kugeza ku wa 26 Kanama 2021 bari mu Rwanda.
Ibiro bya Minisiteri y’Ingabo z’u Rwanda bivuga ko Gen. Mabeyo yasuye Minisitiri Maj. Gen. Albert Murasira, agirana ikiganiro na mugenzi we, Gen. Jean Bosco Kazura uyobora ingabo z’iki gihugu.
Uruzinduko rwa Gen. Mabeyo mu Rwanda rugamije gukomeza imikoranire hagati y’ingabo z’ibihugu byombi nk’uko yabitangaje.
Yasuye urwibutso rwa jenoside yakorewe Abatutsi rwa Kigali ku Gisozi, bikaba biteganyijwe ko azanasura ishuri rikuru ry’ingabo z’u Rwanda riherereye mu Karere ka Musanze n’umudugudu w’icyitegererezo wa Kinigi wubatswe na Minisiteri y’Ingabo.
Uruzinduko rwa Gen. Mabeyo n’iri tsinda rukurikiye urwo Gen. Kazura n’Umuyobozi Mukuru wa Polisi y’u Rwanda, CG Dan Munyuza bagiriye muri Tanzania muri Gicurasi 2021.
Amafoto: Rwanda MOD
