Munyakazi Sadate wari umaze amezi agera kuri atanu areze umunyamakuru Sam Karenzi mu rwego rw’igihugu rw’ubugenzacyaha, RIB, amushinja ibyaha bitandatu, yahagaritse ikirego mu rwego rwo gushyira imbere ubwiyunge.
Sadate wakunze guhanganira na Karenzi mu bitangazamakuru no ku mbuga nkoranyambaga, yandikiye RIB tariki ya 8 Werurwe 2021 ayisaba gukurikirana kuri uyu munyamakuru ibyaha birimo: ivangura, gutangaza agambiriye inabi ibyavugiwe mu muhezo atabiherewe uburenganzira, gukangisha gusebanya, gutukanira mu ruhame, gutangaza amakuru y’ibihuha no kwinjira mu butumwa bw’undi buri muri mudasobwa atabiherewe uburenganzira.
Kuri uyu wa 27 Kanama 2021 yandikiye Umunyambanga Mukuru wa RIB, Co. Jannot Ruhunga ibaruwa ifite impamvu igira iti: “Gusaba guhagarika ikirego”, itangira igira iti: “Nshingiye ku kirego natanze kuwa 8 Werurwe 2021 nashyikirije urwego mubereye umunyamabanga mukuru ndegamo Samuel Karenzi…mbandikiye mbamenyesha ko ibirego byose nari narareze Samuel Karenzi mbihagaritse, nkaba mbasaba ko namwe mwahagarika kubikurikirana.”
Sadate yabigaragarije n’abamukurikira ku rubuga rwa Twitter, asobanura ati: “Nyuma y’ikirego nareze Sam Karenzi n’ubuhuza bwa RMC kandi mbona bwatanze umusaruro, nyuma y’uko RadioTV10 Rwanda na Sam Karenzi bubahirije ibyo biyemeje, nk’Umunyarwanda kandi umusportif mpagaritse ibirego nareze Sam Karenzi muri RIB kugira ngo duhe umwanya ubwiyunge.”
Yakomeje ati: “Ndahamanya n’umutimanama wanjye ko inzira y’ubwiyunge no kwiyoroshya ari zo nzira nziza kurusha izindi zose. Ubwubahane n’bworoherane kuri twese. Fair-play is the Key of success.”
Sadate ahagaritse ibi birego nyuma yo guhurira na Karenzi mu kiganiro mpaka kuri televiziyo y’igihugu tariki ya 8 Kanama 2021. Bombi bifashishije imbuga nkoranyambaga, bagaragaje ko bishimiye guhurira muri iki kiganiro, n’uko cyagenze.
