Icyumweru gishize cyatangiye tariki ya 23 Kanama 2021 cyaranzwe n’inkuru nyamukuru ziganjemo izivuga ku: mutekano, ubutabera, ikoranabuhanga na politiki mu bubanyi n’amahanga.
Zirimo:
Me Lurquin ngo yafunzwe amasaha 12 mbere y’uko yirukanwa mu Rwanda
Umunyamategeko Vincent Lurquin wo mu Bubiligi wunganiraga Paul Rusesabagina, yatangaje ko mbere yo kwirukanwa mu Rwanda mu minsi ishize, yabanje gufungwa amsaha 12, amara amasaha 6 ahatwa ibibazo.
Uyu munyamategeko wirukanwe ashinjwa kujya mu rukiko rwo mu Rwanda yambaye umwambaro w’akazi nta ruhushya yabiherewe, yasobanuriye igitangazamakuru DW ishami rya Afurika ko nta kosa yakoze, ahubwo yahohotewe.
Umuyobozi w’urwego rushinzwe abinjira n’abasohoka, Lt. Col. Regis Gatarayiha yasobanuriye itangazamakuru ko Me Lurquin yari yarahawe uruhushya rumwemerera gusubura u Rwanda, we yica amategeko, arukoresha ajya kunganira Rusesabagina. Yavuze ko ari icyaha gihanwa, ikaba ari yo mpamvu yirukanwe muri iki gihugu.
MTN yahawe nyiratarengwa
Urwego rw’igihugu ngenzuramikorere, RURA, rwahaye MTN Rwandacell PLC igihe ntarengwa cyo kuba yakemuye ibibazo abakiriya bayo bahura nabyo mu itumanaho birimo kwikura ku murongo kwa telefone, kuvugana amajwi ntiyumvikane n’amarezo make.
RURA yamenyesheje iki kigo cy’itumanaho ko nikitabikemura mu mujyi wa Kigali bitarenze tariki ya 29 Ukwakira 2021 no mu bindi bice by’igihugu bitarenze tariki ya 30 Ugushyingo 2021, izagifatira ibihano birimo n’iby’amafaranga.
Itangazo rya RURA ryahumurije abakiriya b’iki kigo bari bamaze igihe kirekire binubira serivisi zacyo zari zaraburiwe ibisubizo. Iki kigo nacyo mu kiganiro cyagiranye na The New Times, cyatanze icyizere ko igihe ntarengwa kizagera cyaramaze gukemura ibi bibazo, cyane ko ngo cyari kizi ko bihari.
RDF yungutse abasirikare bashya batorejwe i Nasho
Igisirikare cy’u Rwanda kizwi nka RDF tariki ya 28 Kanama 2021 cyungutse abasirikare bashya bamaze umwaka bahabwa imyitozo y’ibanze mu ishuri rya gisirikare rya Nasho.
Umuhango wo kwinjiza muri RDF ku mugaragaro, wayobowe n’Umugaba Mukuru, Gen. Jean Bosco Kazura, wabashimiye kuba barahisemo iyi nshingano ikomeye yo gukorera no guharanira iterambere ry’igihugu.
Imyitozo aba basirikare bahawe irimo ngororamubiri n’iyo gukoresha imbunda.
U Rwanda rwemeye kwakira impunzi zituruka muri Afghanistan
Guverinoma y’u Rwanda ibisabwe na Leta Zunze Ubumwe za Amerika (USA), yemeye kwakira impunzi ziri guhunga Afghanistan nyuma yo gufatwa n’umutwe witwaje intwaro w’Abatalibani tariki ya 15 Kanama 2021.
Ku ikubitiro, byatangajwe ko hari abanyeshuri, abarimu n’abayobozi bose hamwe 250 bo mu ishuri ry’abakobwa ryigisha imiyoborere rya SOLA bari mu nzira berekeza mu Rwanda, aho byateganyijwe ko bazarangiriza amasomo y’igihembwe muri iki gihugu.
Nta makuru arambuye Umuvugizi wa Guverinoma, Yolande Makolo yahaye itangazamakuru tariki ya 23 Kanama, gusa yasobanuye ko azatangwa uko Leta y’u Rwanda na USA zizagenda zibyumvikanaho.
Safari yabaye Safari
Umusaza witwa Safari George wo mu Kagari ka Musenyi mu Murenge wa Karangazi w’Akarere ka Nyagatare akomeje kuvugwa cyane ku mbuga nkoranyambaga, nyuma yo kugaragara yigaranzura umukozi w’urwego rwa DASSO washakaga kumukubita, yamusuzuguriye intege nke yamubonagaho.
DASSO na Gitifu w’Akagari, Twahirwa Gabriel mu byumweru bibiri bishize bagaragaye bahohotera umushumba wa Safari mu rwuri yari aragiyemo. Ntibanyuzwe, bakomeje birukankana uyu musaza ngo bamukubite. Bivugwa ko bari mu gikorwa cyo gufata inka ziragirwa ku gasozi, birangira umusaza amutuye hasi, amufata mu ngoto, DASSO na we aratabaza.
Safari yatawe muri yombi ariko aza kurekurwa nyuma y’iperereza ryagaragaje ko yitabaraga. Ahubwo uyu DASSO na Gitifu bo bahagaritswe ku kazi, bazira gukoresha imbaraga z’umurengera muri iki gikorwa barimo.
