Umusirikare mukuru wa Ethiopia, Lt. Gen. Bacha Debele yatangaje ko ingabo z’iki gihugu ziciye mu bitero bikomeye abarwanyi 5600 b’umutwe witwaje intwaro wa TPLF uharanira ubwigenge bw’intara ya Tigray.
Nk’uko tubikesha BBC, Gen. Debele yatangaje ko hari abandi barwanyi ba TPLF 2300 bakomerekeye muri iyi mirwano n’ingabo za Leta mu gihe, 2000 bafashwe mpiri.
Ntabwo uyu musirikare yigeze atangaza igihe aba barwanyi biciwe, bakomerekeye n’igihe bafatiwe mpiri; gusa ikizwi ni uko impande zombi zimaze iminsi zirwanira mu ntara ya Amhara na Afar.
Ingabo za Ethiopia mu minsi ishize, ziherutse kwemeza ko zamaze kwirukana abarwanyi ba TPLF muri izi ntara zari zinjiyemo, zikomeje kugaba ibitero ku ngabo za Leta.
Minisitiri w’Intebe w’iki gihugu, Abiy Ahmed yanatangaje ko izi ngabo zabohoje abasirikare (babarirwaga mu bihumbi) bari barafashwe mpiri n’aba barwanyi kugeza mu ntangiriro za Nyakanga 2021.
Imirwano hagati y’ingabo za Leta na TLPF yatangiriye muri Tigray mu Gushyingo 2020. Icyo gihe aba barwanyi bashinjwaga kugaba ibitero ku birindiro by’izi ngabo, bikurura intambara yeruye.
