Abarwanyi batandatu b’Abanyapalestine ku wa 5 Nzeri 2021 batorotse gereza ya Gilboa iri hagati y’inyanja ya Galileya n’umujyi wa Jenin mu Karere ka West Bank, imwe mu zirindwa mu buryo bukomeye muri Israel, baciye mu mwobo.
CNN dukesha iyi nkuru ivuga ko mu barwanyi harimo uwahoze ari komanda w’iumutwe witwaje intwaro wo muri Palestine wegamiye ku ishyaka rya Fatah, Zakaria Zubeidi. Abandi batanu ngo ni ab’umutwe wa Islamic Jihad.
Nyuma yo kumenya ko abarwanyi bayo batorotse, Islamic Jihad yasohoye itangazo yishimira iki gikorwa, ivuga ko bakoze ubutwari, ndetse ko ari urushyi bateye ingabo za Israel na politiki yose y’iki gihugu.
Polisi ya Israel ivuga ko ku bufatanye n’urwego rushinzwe ubutasi, batangiye guhiga aba barwanyi ngo babasubize muri gereza. Iyi operasiyo iri kwifashisha utudege tutagira abapilote na kajugujugu.
