Urukiko Rwisumbuye rwa Nyarugenge ku wa Gatanu tariki ya 11 Werurwe, rwategetse ko Dr Igabe Egide afungurwa akarekurwa by’agateganyo akazaburana mu mizi adafunze.
Umucamanza yavuze ko Dr Igabe urukiko ruzemeza ko afunguwe ari uko urukiko rumaze kubona koko ko ayo mafaranga yishyuwe.
Umucamanza yavuze ko ariya Frw miliyoni 5 agomba gushyirwa kuri Konti no 000400697162075 y’Urukiko Rw’ikirenga iri muri Banki ya Kigali (BK).
Umucamanza yategetse ko mu gihe Dr Igabe Egide azaba afunguwe by’agateganyo, ategetswe kuzajya yitaba ubushinjacyaha buri wa Gatanu w’icyumweru mu gihe cy’amezi atatu; akazajya aba yageze ku bushinjacyaha Saa mbili za z’igitondo.
Dr Igabe Egide ubwo yaherukaga mu Rukiko Rwisumbuye rwa Nyarugenge kuwa 03 Werurwe 2022, yagaragaye mu Rukiko yunganiwe na Me Uwiragiye Prosper.
Yari yasabye Urukiko ko rwamurekura by’agateganyo akajya kuvuza umwana we urembye, asaba ko yatanga ingwate y’amafaranga ingana na Miliyini 5Frw akarekurwa by’agateganyo.
Yasabye urukiko ko rwamuha Konti y’urukiko ayo mafaranga akayashyiraho.
Umucamanza ubwo yasomaga icyemezo cy’urukiko yavuze ko ubujurire bwa Dr Igabe Egide bwemewe kuri bimwe.
Ubwo Icyemezo cya Dr Igabe Egide cyasomwaga yaba we cyangwa ubushinjacyaha nta n’umwe wari mucyumba cy’urukiko, n’umunyamategeko ntabwo yagaragaye ubwo uru rubanza rwasomwaga.
Dr Igabe Egide Ubushinjacyaha bumukurikiranyeho icyaha cyo gukora no gukoresha inyandiko mpimbano gihanishwa gutanga amande anagana na Frw Miliyoni 3 cyangwa igihano gisubitse. Cyakora cyo umucamanza itegeko rimwemerera ko ashobora no gutanga igihano cy’igifungo.
Ku wa 07 Mutarama 2022 nibwo Urwego rw’Ubugenzacyaha (RIB) rwatangaje ko rwataye muri yombi Dr Igabe Egide rumukurikiranyeho gukoresha inyandiko mpimbano y’impamyabumenyi ihanitse (PHD), mu gushaka akazi mu muri kaminuza zitandu zitandukanye zo mu Rwanda.
Bivuze ko Dr Igabe arekuwe by’agateganyo amaze amezi asaga atatu afunze.
Jean Paul Nkundineza
