Abagore 19 bahinga kawa bibumbiye mu itsinda ‘Abishyize Bamwe’ rikorera mu kagari ka Rushyarara, umurenge wa Karambi mu karere ka Nyamasheke kuri uyu wa 9 Ugushyingo bashyikirijwe na kampani ya Dorman imashini zidoda mu rwego rwo kubongerera ubushobozi bwo gukora ku ifaranga ngo barusheho kunoza ubuhinzi bwabo.
Mu kiganiro na BWIZA nyuma yo kuzihabwa, aba bagore bavuga ko ubusanzwe bahinga kawa bafatanije n’abagabo babo, zakwera bakazigemura ku ruganda rwa Kanzu, rwa kampani ya Dorman Rwandaruri mu kagari ka Kabuga, muri uyu murenge, bakavuga ko mu rwego rw’uko uruganda rugomba guharanira iterambere ry’abahinzi rukorana na bo, rwababumbiye mu matsinda 4.
Amatsinda 2 yahawe inka, irindi rihabwa ingurube, iri ryabo rikaba ryahawe imashini zidoda kuko rigizwe n’abegereye ahajyanye n’iki gikorwa, kuri santere y’ubucuruzi ya Tyazo muri uyu murenge, hafi y’uruganda rw’icyayi ra Gatare, hari n’ibigo by’amashuri, ku buryo kubona abo badodera, ifaranga rikinjira ku bwinshi na ya kawa igakorerwa neza, ikarushaho gutanga umusaruro ukenewe bizaborohera cyane.
Nyiranzabandora Césalie, umwe mu bayobozi b’iri tsinda, avuga ko mbere bashoraga kawa bisanzwe kuri uru ruganda, bagahabwa amafaranga, bakumva ko ari yo sano bafitanye, gusa, ariko nyuma y’aho babwiriwe kwishyira hamwe mu matsinda nk’abagore, bagahabwa ikibafasha kongera umusaruro, nk’ayo matungo n’izo mashini, bakanahabwa ingemwe nziza zigezweho za kawa, n’ifumbire, byose ku buntu, byiyongera ku bumenyi bagiye bahabwa kuri iyi mishinga mishya, ngo biyumvisemo imbaraga zo kurushaho gukunda kawa no kuyibyaza umusaruro uruseho.
Ati: “Buri wese, uko turi 19, yahawe imashini ye bwite agiye gukoresha, batwongera n’indi ya 20 y’umuriro izajya isirifira imyenda twadoze, zikazadufasha cyane kongera umusaruro w’ubuhinzi kuko ibigenda kuri kawa byose byari bimaze kongera ibiciro kandi kawa yera riwe mu mwaka, ku buryo kubona amafaranga y’inyunganizi dukoresha mu buhinzi byari bitangiye kutugora.’’
Arakomeza ati: “Nk’ubu, kubera ko aho twakuraga ubwatsi buzisasira hafi ya hose hatewe icyayi, bwarahenze cyane kuko agatwaro kamwe kageze ku mafaranga 1500 kandi nkanjye mfite kawa 300 nkenera nibura udutwaro 40 kugira ngo mbe nzisasiye mu buryo nifuza. Kubona ayo mafaranga 60.000 nkongeraho ayo abahinzi badufasha kuzitaho, aho umuhinzi umwe ageze ku mafaranga 1500, urumva ko,nshungira ku buhinzi gusa ntayabona ngo n’ibindi nkenera mu rugo bikunde.
Ariko nimara kumenya kudoda neza nzajya ndodera nk’amafaranga 3000 ku munsi, nkuremo ayo mpa umugabo ajyane muri ubu buhinzi,andi tuyikenuze mu rugo tunazigame muri SACCO, tunategure ejo hazaza harushijeho kuba heza.’’
Avuga ko uyu mushinga nugenda neza, bazanabona bitagoranye amafaranga y’ishuri y’abana babo yari atangiye kubabera umutwaro, bakishyura mituweli na ejo heza nta mbogamizi, bakagaburira abana babo indyo nziza kurushaho, bakabona n’ibindi urugo rukenera kuko amafaranga azaba yinjira buri munsi, igihe cy’umwero wa kawa cyo bikazaba ari akarusho mu kwinjiza ifaranga no kwizigamira.
Ikindi bavuga ngo ni uko bigiye kubaruhura imvune bavunikaga mu mirimo y’ubuhinzi, bagakora ibiwunganira byinjiza amafaranga vuba, bakazafasha abagabo babo mu kuzamura imibereho y’ingo zabo. Biyemeje gukorera kawa neza mu mafaranga yose bazajya babona , bagaha uyu mushoramari kawa nziza, bakanamushakira abandi bakiliya babereka ibyiza bamukesha, inyungu ikazabageraho bose.
Namugize Délina ati: “Bitwongereye imbaraga zo kwita kuri kawa cyane birushijeho, tukazaha umushoramari wacu kawa nziza, tukanamushakira abandi bakiliya, kuko turenze ibyo kugurirana kawa gusa tukaba inshuti nya nshuti, n’ibindi bigiye kwikora, kawa tiyiteho bishoboka byose kuko uburyo bwo kubona amafaranga ayitaho bubonetse.’’
Bavuga ariko ko nubwo bahawe izi mashini bafite ibibazo bumva bafashwa gukemurirwa, birimo umwarimu uzazibigisha kuko bamwe batazizi, bikazasaba kubanza kuziga, bakishimira ko bazaziga bazifite ariko bafite imbogamizi z’umwarimu uhenze batapfa kubona ayo bamwishyura.
Ikindi ngo ni amafaranga yo gukodesha inzu bazakoreramo kuko bazajya batanga arenga 200.000 mu mwaka, bakifuza ubufasha ngo biyubakire iyabo bwite kuko ari byo bitabahenda kurushaho. Bifuza n’amapasi kuko batadoda ibidateye ipasi, bakanasaba imashini idoda imipira y’imbeho kuko isoko ryayo na ryo baribona neza, ibi ngo babibonye cyaba gikemutse burundu.
Banasaba ubuyobozi bw’umurenge wabo ubuvugizi ntibahite bazitangira imisoro kandi zitaratangira gukoreshwa mu buryo bw’akazi, zigiye kubanza gukoreshwa bazigiraho, bagatinya ko zafatwa nk’izinjiza amafaranga bakazisoresha, ariko umurenge ubafashije wabisobanura neza ntibazisorere, bakanawusaba kubafasha mu mutekano wazo igihe bacyisuganya, ntihagire uzibiba.
Kuri ibi basaba umushoramari, Ngabonziza Jean Louis, umukozi wa Dorman Rwanda, avuga ko bagiye kubaba hafi ku buryo babyishakira, kuko ubonye imashini kubona umwigisha kandi muri bo hari abazizi bitabagora, ipasi itaba ikibazo, ikibazo cyaba gusa inyubako bakoreramo na ziriya mashini, bakazafashwa mu bujyanama uko babigeraho kuko bagiye kurushaho kubaba hafi.
Akomeza avuga ko iki gitekerezo cyatangiye muri 2019 hagamijwe kongerera ubushobozi cyane cyane abagore bahinga kawa kuko imvune nyinshi ari bo zigeraho, bahera mu kubashyira mu matsinda aho bagombaga gukora, bakaba barafashije abakorana n’inganda zabo 7 mu gihugu, zirimo 4 za Nyamasheke, rumwe rwa Rusizi, urwa Kamonyi mu majyepfo n’urwa Gatsibo mu burasirazuba, imishinga yose hamwe bafashije ni 28.
Ati: “Dusanzwe dutera inkunga imishinga itandukanye y’abahinzi dukorana tugamije kubafasha mu mibereho myiza, aho tububakira amashuri, kubaha inka, gusana imihanda n’ibindi, byose hagamijwe ko tudahuzwa n’umuhinzi wa kawa no kuyitugurisha gusa, ahubwo twubahiriza icyemezo cya NAEB ko uruganda rugomba guteza imbere bifatika abahinzi bakorana na rwo.’’
Yongeyeho ati: “Turabasaba gufata neza ibyo tubaha, bakabibyaza umusaruro uzana impinduka igaragara mu iterambere ryabo, bashyire imbaraga mu gukorera kawa,bayishakemo ubwiza n’ubwinshi bukenewe. Nyuma yo kubibaha kuko hose tuharangije, hagiye gukurikiraho isuzuma,turebe uko babikoresha, babifata neza banabibyaza umusaruro kuko ari cyo cy’ingenzi tubifuzaho.”
Kawa iri mu byinjiriza agatubutse abaturage b’imirenge cyane cyane ya Karambi, Kirimbi, Macuba na Kanjongo muri Nyamasheke bakorana n’uyu mushoramari, akavuga ko abahawe inka bahawe n’umuveterineri uzazikurikirana,aba bahinzi bakanamushimira ko abaha ubwasisi neza.
Ku cyo basaba cyo kongererwa igiciro kuko ibyangombwa byose bakoresha mu kongera umusaruro na byo byazamuye ibiciro, Ngabonziza avuga ko bizakorwa hakurikijwe igiciro ku isoko mpuzamahanga.
Umunyamabanga Nshingwabikorwa w’umurenge wa Karambi, Uwizeyimana Emmanuel, yabijeje ubufasha mu mutekano w’izi mashini no kubaba hafi kugira ngo amatsinda yose ibyo yahawe abibyaze umusaruro ufatika, hagamijwe kuzamura mu bwiza no mu bwinshi kawa, ikarushaho kubateza imbere birambye.
