Umutwe witwaje intwaro wa RED Tabara urwanya ubutegetsi bw’u Burundi urigamba gusenya umunara uyobora indege uherereye ahitwa Gihungwe, mu ntara ya Bubanza, mu ijoro ryo kuri uyu wa 2 Nzeri 2023.
Mu ijoro ryakeye humvikanye amakuru y’igitero cy’abitwaje intwaro baturutse mu ishyamba rya Rukoko riherereye muri Bubanza, “bashaka kwinjira mu baturage” nk’uko umunyamakuru wiyita King Umurundi yabitangaje.
Uyu munyamakuru ukunze gutangaza amakuru agezweho mu Burundi, mu ijoro ryo kuri uyu wa 2 Nzeri yagize ati: “Abo bitwaje intwaro barasanye n’abashinzwe umutekano. Muri aka kanya imodoka ya Probox irimo irashya, iyindi ya Allion bayirashe cyane. Umuntu umwe ni we bigaragara ko bagiye barashe cyane, hafi y’aho imodoka iri guhira. Abitwaje intwaro basubiye mu Rukoko.”
RED Tabara kuri uyu wa 3 Nzeri yatangaje ko ari yo yagabye iki gitero, kandi ngo yasenye uyu munara. Iti: “RED Tabara iratangaza ko ingabo zacu zagabye igitero kandi zisenya umunara uyobora indege hafi y’ikibuga cy’indege mpuzamahanga cya Melchior Ndadaye kiri i Bujumbura, uherereye muri Gihungwe, komine Gihanga, intara ya Bubanza mu ijoro ryo kuri uyu wa Gatandatu.”
Uyu mutwe uvuga ko uharanira ko mu butegetsi bw’u Burundi haba impinduka, uravuga ko abarwanyi bawo baba imbere mu gihugu kandi ngo babasha gutera aho bashaka no mu gihe babishakiye.
Ntacyo Leta y’u Burundi iratangaza kuri iki gitero. Gusa ifite ingabo mu ntara ya Kivu y’Amajyepfo muri Repubulika ya demukarasi ya Congo, aho zagiye kurwanya imitwe yitwaje intwaro irimo RED Tabara.
