RDC irabona Kikwete nk’umucunguzi mu rugamba rwayo na M23

Ubutegetsi bwa Repubulika ya demukarasi ya Congo (RDC) burabona Jakaya Mrisho Kikwete wabaye Perezida wa Tanzania, nk’umucunguzi mu rugamba ingabo zabwo zihanganyemo n’umutwe witwaje intwaro wa M23.

Kikwete usanzwe ari Perezida w’akanama k’inararibonye k’umuryango wa Afurika y’amajyepfo, SADC, yageze i Kisangani muri Haut-Katanga tariki ya 2 Ukwakira 2023, ahahurira na Perezida wa RDC, Félix Tshisekedi wari waharaye.

Bijyanye n’uko Kabila na we amaze iminsi muri Kisangani, byavuzwe ko Kikwete ashaka kumwunga na Tshisekedi kuko bamaze igihe batavugana, gusa Umuvugizi wa guverinoma ya RDC, Patrick Muyaya, yatangaje ko ibi atari ukuri.

Muyaya yasobanuriye itangazamakuru ko icyajyanye Kikwete muri Kisangani ari ukugira ngo aganire na Tshisekedi ku buryo ingabo z’ibihugu bya SADC zajya mu burasirazuba bwa RDC. Ati: “Kikwete wabaye Perezida wa Tanzania yaje kuganira na Perezida wa Repubulika ku ngabo za RDC zishobora kuza muri RDC. Ntabwo yaje mu mishyikirano.”

Umuvugizi wa Perezida wa RDC, Tina Salama, yatangaje ko mu 2013, ubwo Kikwete yayoboraga Tanzania, igihugu cye cyohereje abasirikare mu mutwe w’ingabo kabuhariwe zishamikiye kuri MONUSCO, zitsinda umutwe wa M23, kugeza ubwo wasenyutse, abari bawugize bahungira muri Uganda no mu Rwanda.

Yagize ati: “Nka Perezida w’akanama k’inararibonye ka SADC, Perezida w’icyubahiro yakiriwe muri iki gitondo na Perezida Tshisekedi, baganira ku kohereza ingabo za SADC. Birakwiye kwibuka ko Kikwete yari Perezida wa Tanzania mu 2013 ubwo M23 yatsinzwe gisirikare na FARDC na FIB.”

Umuvugizi wa M23 mu rwego rwa gisirikare, Maj. Willy Ngoma, yatangarije BWIZA ko Tshisekedi, Kikwete na Kabila bahuriye i Lubumbashi, gusa ngo ntacyo bitanga kuko mu 2013 hatandukanye no mu 2023. Ngo igikenewe ni ibiganiro, aho gushoza intambara.

Maj. Ngoma yagize ati: “Mu 2013 ubwo twagendaga hari Kabila, Kikwete na Jacob Zuma. Perezida Obama icyo gihe yabahaye uburenganzira. Uyu munsi ibintu biratandukanye. Kabila yahuye na Kikwete na Tshisekedi, twebwe nta bwoba na buke dufite. Twebwe turwanira uburenganzira, Abanyekongo bamenye ko tubakunda, dukunda amahoro. 2013 si 2023. Ubu Isi yose irasaba Tshisekedi kuganira na M23, ariko yarabyanze. Isi izi ko dufite uburenganzira. Abantu ntibagire ubwoba.”