Umutwe witwaje intwaro wa ADF urakekwaho kwica abaturage 46 mu giturage cya Masini, Gurupoma ya Badibongo Siya muri Teritwari ya Irumu iherereye mu Ntara ya Ituri, muri Repubulika ya Demukarasi ya Congo.
Umudepite Jackson Ausse Afingoto watorewe muri Irumu, yahamirije aya makuru 7sur7 kuri uyu wa 14 Mutarama 2021, avuga ko mu bishwe bose bo mu bwoko bw’abasangabutaka, ati: “Ndemeza ko abitwaje intwaro bishe abasangwabutaka 46. Ni ADF yari ifite imihoro. Ni ADF yabishe.”
Nk’uko Ibiro Ntaramakuru by’Abongereza byabitangaje kuri uyu wa 15 Mutarama, Minisitiri ushinzwe ibikorwa by’imbere muri Ituri, Adjio Gidi na we yemeje uyu mubare w’abiciwe muri iki gitero.
Ubwo abitwaje intwaro batangiraga kwica aba baturage, bamwe muri bo bahungiye mu tundi duce turimo Komanda, bamenyesha inzego z’umutekano zirimo ingabo z’igihugu, zahise zihagoboka.
