Ikigo cy’itumanaho Airtel, ishami rya Uganda, cyaciwe amashilingi arenga miliyoni 700 kizira gukoresha indirimbo 8 z’umuhanzi wo muri Jamaica wamamaye nka Konshens nta burenganzira kimusabye.
Izi ndirimbo, nk’uko ikinyamakuru Daily Monitor cyabitangaje, ni: Simple Song, Gyal a Bubble, So Mitan, Stop Sign, Jamaican Dance, Konshens Jazz Version, No Retreat na Jah Love Me.
Uyu muhanzi wunganirwaga n’umunyamategeko Me Silver Kayondo ukorera i Kampala yareze mu rukiko rw’ubucuruzi rwo muri Uganda Airtel n’ikindi kigo cyitwa OnMobile Global gikora porogaramu za telefone, abishinja ubufatanye mu gukoresha izi ndirimbo nka ‘Caller Tunes’ mu nyungu zabyo.
Konshens kandi yabwiye urukiko ko ibi bigo byombi byagurishije izi ndirimbo ku bakiriya babyo nka ‘Caller Tunes’, buri inshuro indirimbo yamanuwe (downloaded), ikishyurwa amashilingi 600, ariko ntibyanamwegera ngo bimuheho na make.
Umucamanza wayoboye uru rubanza mu rukiko rw’ubucuruzi, Mutesi Patricia, yanzuye ko koko Airtel na OnMobile byakoresheje indirimbo za Konshens bitamusabye uburenganzira, kandi byizinjizamo amafaranga, ntibyagira ayo bimuhamo.
Yategetse Airtel kwishyura Konshens amashilingi miliyoni 700 ajyanye n’uburyo izi ndirimbo zagurishijwe, inategeka iki kigo kumuha indishyi z’ibyangiritse zingana na miliyoni 20 z’amashilingi. OnMobile yo yategetswe gutanga indishyi ya miliyoni 30 z’amashilingi.
Ibi bigo byombi ntacyo byatangarije itangazamakuru kuri uyu mwanzuro wafashe n’urukiko.
