Kapiteni w’ikipe nkuru y’umupira w’amaguru y’u Burundi, Saido Berahino ubu ni umukinnyi mushya wa Sheffield Wednesday FC iri muri shampiyona y’icyiciro cya gatatu mu Bwongereza, League One.
Uyu rutahizamu yarezwe na West Bromwich Albion kuva afite imyaka 11 y’amavuko, yigaragaza cyane ubwo yayikiniraga muri shampiyona y’icyiciro cya mbere muri iki gihugu, English Premier League mu mwaka w’imikino w’2014/2015.
Muri uwo mwaka, Berahino yakiniye West Brom imikino 45 mu marushanwa yose yitabiriye, atsinda ibitego 20. Icyo gihe Tottenham Hotspur yari itangiye kumurambagiza ngo ayibere rutahizamu wayo mushya, ariko ikibazo cy’imyitwarire mibi irimo ubusinzi cyatumye imureka.
Mu 2016/2017 yavuye muri West Brom ajya muri Stoke City nayo yari muri Premier League aguzwe miliyoni 12 z’Amayero, imanuka mu cyiciro cya kabiri, EFL Championship mu 2017/2018.
Stoke City yahise imurekura hari habura imyaka itatu ngo arangize amasezerano impande zombi zari zanyinyanye, ajya muri Zulte Waregem mu cyiciro cya mbere cya shampiyona y’u Bubiligi, ari nayo avuyemo ajya muri Sheffield Wednesday.
Berahino kandi yakiniye amakipe y’u Bwongereza y’ingimbi, arimo: iy’abatarengeje imyaka 16 kuva mu 2008 kugeza mu 2009, iya 17 yafashije kwegukana igikombe cy’i Burayi kizwi nka European Championship, iya 18,19,20 na 21 kuva mu 2013 kugeza mu 2015.
Uyu Murundi mu 2014 yahamagawe kugira ngo akinire ikipe nkuru y’u Bwongereza ariko ntiyigeze ahabwa umwanya wo gukina. Yahise yiyegurira ikipe y’igihugu y’u Burundi, bigera aho mu 2018 ayifasha kubona itike yo kwitabira irushanwa ry’igikombe cya Afurika, CAN mu 2019.
