Abarwanyi 9 b’umutwe witwaje intwaro wa FLN urwanya Leta y’u Rwanda, bari baherutse gutabwa muri yombi n’ingabo z’u Burundi, baba baherutse gupfira muri kasho y’urwego rushinzwe iperereza mu ntara ya Cibitoke.
Aba barwanyi bafatiwe mu mirwano ya FLN n’ingabo z’u Burundi yabereye mu ishyamba rya Kibira muri Kanama 2023, yakurikiye impuruza abatuye muri Cibitoke bari bakomeje gutanga ku kugaragara kw’izi nyeshyamba mu biturage.
Urubuga SOS rwatangaje ko amakuru rwahawe n’abapolisi avuga ko aba barwanyi bapfiriye muri kasho biturutse ku iyicarubozo bakorewe, nyuma y’ibwiriza ryatanzwe mu rwego rwo kwihanangiriza abayobozi n’abasirikare bakomeje gukorana na FLN.
Aba bapolisi bavuze ko imodoka y’urwego rw’iperereza mu ntara ya Cibitoke n’iya Bubanza ari zo zatwaye imirambo y’aba barwanyi, ijyanwa gushyingurwa ahataramenyekana, mu ijoro ryo ku wa 30 Kanama 2023. Hari uwagize ati: “Izi nyeshyamba 9 zajyanwe gushyingurwa hataramenyekana.”
Umuyobozi ushinzwe urwego rw’iperereza muri Cibitoke, Ahmed Sindayigaya, yatangaje ko aya makuru ari “ibinyoma bidafite ishingiro”. Yabajijwe ku modoka y’iperereza ya Bubanza yagaragaye kuri iyi kasho mu ijoro ry’uwo munsi, asubiza ko yari muri misiyo y’akazi yoroheje.
Guverineri w’intara ya Cibitoke, Bizoza Caràªme, yatangaje ko atazi aya makuru, gusa ngo hatangiye iperereza hamenyekane ukuri kw’ibivugwa ko byabereye muri iyi kasho.
Iyi nkuru imenyekanye nyuma y’aho Minisitiri w’Intebe w’u Burundi, Gervais Ndirakobuca, ubwo mu kwezi gushize yasuraga Cibitoke, yaburiye abakorana na FLN, abateguza ko bashobora kuzakuramo ibyago birimo n’urupfu, kuko ngo uyu mutwe witwaje intwaro ukomeje kubicira abasirikare.
Hari tariki ya 22 Kanama 2023, Ndirakobuca abwira abaturage ba Cibitoke ati: “Mufite ibyago byo kuba mwashyingura abantu 300 icya rimwe. Ntituzemera ko abasirikare bacu bakomeza kwicwa. Kubera iki mufasha bariya bantu? Niba bafite ibyo basaba, nibajye kubisabira muri kiriya gihugu [u Rwanda], hanyuma babihererweyo. Bashobora guteza ibibazo bikomeye birenze uko mubitekereza.”
